ORANJESTAD (AAN): Colegio Bon Bini ta un di e scolnan ganador di e proyecto di Edutech di Gobierno di Aruba y Futura den cual a pone fondo disponibel pa proyectonan di innovacion di scolnan. Cabestante di e scol señora Sherissa Tsu a expresa cu Colegio Bon Bini ta sumamente contento pa motibo cu ya pa hopi tempo tabata buscando financiamento pa
adkiri material digital pa e scol.
Señora Tsu a splica cu durante di Pandemia a haci diferente workshop cu e maestranan pa nan por tin conocemento pa duna les digital, den e periodo aki a tuma nota di cambio drastico den e muchanan. Na e momento cu a cuminsa duna les back na scol back, a tuma nota cu e motivacion a baha back. Pa e motibo aki a cuminsa busca sponsor diferente caminda pa logra haya un ‘smart board’ den klas, pero no a logra.
Ora cu Edutech a anuncia e posibilidad pa scolnan bin na remarca pa financiamento, Colegio Bon Bini a manda e plan y meta di escol cu ta inclui borchi digital pa tur e klasnan y tablet pa e “smart room”. Como un di e scolnan ganado, Colegio Bon Bini a ricibi 4 borchi digital y 25 tablet. Ademas tur maestro a ricibi curso di con pa traha cu e borchinan digital.
Manera cu ta conoci, lesnan audio visual ta yuda muchanan siña mas mihor y retene mas informacion. Maestronan a tuma nota tambe di e cambionan positivo cerca e muchanan cu e lesnan interactivo. Adicionalmente haciendo uzo di materialnan digital, ta trahando tambe na e asina yama “21st centery skills”. Pues tur locual cu e muchanan ta siñando awo, lo yudanan hopi den futuro.
Finalmente, señora Tsu a gradici Gobierno y Futura cu e proyecto di Edutech cual a hacie posibel pa adkiri materialnan digital, pa por brinda e muchanan lesnan den forma mas innovativo.
