ORANJESTAD (AAN): Recientemente a sali un boletin tocante e exigencianan di admision na HAVO 4 di Colegio Arubano pa e alumnonan cu ta bin di MAVO 4.
Eroneamente a informa cu exigencianan ta mas estricto. Segun Directiva y Rectorado di Colegio Arubano a declara Diaranson atardi, esaki no ta e caso.
DIARIO a compronde cu e exigencianan di admision ta igual na esunnan di aña pasa. A indica cu no lo admiti alumno sin 8 pa Wiskunde. Esaki no ta cuadra! Loke si ta e caso ta cu pa un alumno scoge Wiskunde B, mester tin 8 pa Wiskunde na MAVO. Sin Wiskunde B ainda e alumno por scoge un profiel cu e materianan cu nan a gradua cu nan na MAVO. Pues, no ta asina cu ta limita e alumnonan den nan escogencia.
E insinuacion cu e alumnonan lo por trata e materia di Wiskunde den un siman tampoco ta cuadra. Di otro banda, e sugerencia pa organiza un curso di Wiskunde den vakantie ta hopi bon. Nos tambe ta para tras di esaki y hasta a haya acuerdo pa haci esaki, pero debi na e situacion financiero di e isla, no ta posibel pa financia dicho curso.
Tin pregunta tocante e proefielnan cu Colegio Arubano ta ofrece. E alumnonan cu ta cumpli cu e exigencianan di admision por scoge e mesun materianan cu nan tabata tin na MAVO.
Nos ta guia e alumnonan cu ta bin di MAVO cu e medionan cu nos tin. Nos ta conta cu mentor special pa e alumnonan aki. Banda di esaki, nos kier ofrece les extra di guia, pero desafortunadamente nos no tin ni ora, ni docente pa esaki. Ta duel nos hopi cu a surgi un inkietud. Contrario na e pensamento reinante, Colegio Arubano semper ta cla pa ricibi alumno procedente di MAVO.
Si ainda tin cierto inkietud, rectorado y directiva semper ta disponibel pa contesta tur pregunta.
