ORANJESTAD (AAN): Un di e discusionnan cu por a tuma nota den comunidad ta relaciona cu e cobertura di AZV pa loke ta cuido di diente y wowo.
DIARIO a entrevista e vocero di AZV, Solange Tchong riba e tema aki y el a splica cu pa loke ta cuido dental esaki semper tabata limita.
El a bisa cu ta bon pa bay bek den historia di AZV unda ta wak cu for di 2001 ora cu AZV a inicia, cu e cuido dental pa adulto tabata limita na solamente na loke ta protesis (ariba of abao) of e rancamento di diente.
Ta masha poco ta loke tabata e cobertura di AZV, a remarca.
Loke a sosode ta cu tabata tin plannan pa dado momento, ora cu a bin e discusion aña pasa relaciona cu e cortamento den gasto cu e 5 miyon pa luna, eynan a bin e discusion cu no ta miho pa bay exclui e parti di cuido dental, cu ta un parti hopi chikito.
Ya caba AZV door cu e ley ta defini cu e ta cuido curativo, e tabata poni masha limita na e parti di cuido dental, Tchong a splica.
Aworaki esaki ta para den e sentido cu no a haci ningun cambio ainda riba e parti ey di cuido dental pa motibo cu AZV ta pendiente pa wak kico ta bay sosode. Esaki ta algo cu ta rekeri un cambio den e ley mes di AZV, e PR di AZV a indica.
Dentistanan despues di un tratamento, mayoria di biaha ta prescribi paracetamol pa dolor. Pero aworaki na momento di bay dentista nan ta bisa cu ta bon pa uza algo contra dolor y cu por ta paracetamol y cu eynan tambe ta conta cu mihor e pashent mes cumpr'e y cu no tin nodi di bay botica cu un receta, asina Utra Marapin, Farmaceutisch Adviseur di AZV a duna di conoce.
COBERTURA DI BRIL
Relaciona cu e cobertura di bril, esaki tambe ta uno cu tabata den e pakete di AZV solamente pa casonan extremo. Tur otro caso no tabata cay bao di e cobertura di AZV. Esey ta e pakete basico, a enfatisa.
Esnan cu ta haya bril cubri ta esnan cu ta cay bao di AZV+. AZV ta maneha tambe e seguro medico adicional di Gobierno di Aruba. Pero esey ta totalmente apart for di e AZV basico.
Den e pakete di AZV basico cu mayoria di hende tin, e pakete general di AZV, eynan e cobertura di bril ta practicamente limita den e sentido cu e ta mara na un refraccion di 10 of mas halto.
Segun Tchong, semper nan ta bisa e clientenan cu ora di bay optica, por ehempel, nan caso tin cu wordo evalua. E optician of e docter di wowo ta manda e receta pa AZV y ta haci un peticion pa evaluacion.
Den ki casonan AZV mester duna cobertura? Ta por ehempel ora cu ta referi na AZV un persona cu a nace cu un malesa di wowo y e ora ta haci un evaluacion. Pero tambe esaki ta masha limita na loke AZV ta cubri den e parti ey, Solange Tchong a splica.
