Coach Adolfo Gallego Salas a duna curso di entrenamento y capacidadnan fisico

Mas curso di capacitacion tecnico na Aruba

ORANJESTAD (AAN): Despues di a ricibi un curso virtual algun siman pasa, ekipo di preparadornan fisico di Comite Olimpico Arubano (COA) a ricibi un curso di entrenador Adolfo Gallego Salas di Colombia.

   Adolfo ta di bishita na Aruba, y e ta coach di hisamento di peso tambe ta traha como preparador fisico pa diferente deporte na Colombia. Algun aña atras Adolfo tabata na Aruba como entrenador di e federacion di hisamento di peso “Aruba Amateur Weightlifting Association” (AAWA) unda a logra resultado historico pa Aruba hunto cu atleta Joel Kuiperi, logrando un medaya di plata na e Weganan Suramericano Cochabamba2018.

   Durante dos sesion na COA, e grupo a ricibi curso cu a trata diferente topico importante pa entrenamento fisico. A trata e tema di organiza un plan di entrenamento di preparacion fisico, cu ta conecta cu e necesidad di compronde e diferente capacidadnan fisico y condicional di cada atleta, cu por diferencia a base di e deporte cu ta practica. E capacitacion aki ta sirbi pa asina por eleva e nivel di e preparadornan fisico cu ta continua traha cu tur atleta cu tin bista riba partipacion na e Weganan cu tin pa e Ciclo Olimpico.

  COA ta gradici Adolfo pa su tempo y conocemento comparti cu sigur lo yuda nos entrenadornan sigui desaroya nos atletanan di TeamARU.