ORANJESTAD (AAN): Durante dianan di fiesta, Caribbean Mercantile Bank (CMB) a pone como meta pa transmiti e mensahe di amor, door di resalta e ehempel di e labor bunita cu Centro Famia di Criansa Arubano (CFCA) a bin ta haci pa casi un decada
caba.
E banco amigo ta haya importante pa nos tur na Aruba conoce di cerca kico e tarea aki ta y con nos por contribui na dje; contribui pa ningun mucha na Aruba sinti su mes insigur of desampara.
Pesey CMB a opta pa publica dos video riba diferente medionan digital pa fomenta combersacion riba e topico di Mayor di Criansa y CFCA. Cu mas di 140 mil “views” y centenares di interaccion riba rednan social, CMB ta finaliza su contribucion cu un donacion di Afl. 10,000 na Stichting Fundacion Guia Mi y CFCA. E gesto aki a ser ricibi pa directora di Stichting Fundacion Guia Mi, Señora Anneke Nicholas.
CFCA ta cay bao di encargo di Stichting Fundacion Guia Mi y cu continuamente tin mester di famia nobo interesa pa yuda mucha chikito of mas grandi. Ta asina cu tin un scarcedad grandi di famia di criansa, mas ainda ora cu ta pa mucha mayor di 10 aña.
Mescos cu tur otro, ta mucha cu no a pidi pa sali di nan cas, cu tin sentimento, y si ta un adolescente, mas ainda. Ta importante pa tur mucha tin un persona cu t’ey pa nan ora cu nan no por ta cu nan propio famia. Nan ta desaroya hopi miho den un famia di criansa caminda e por haya atencion, structura y cariño.
Centro Famia di Criansa Arubano ta accesibel pa tur cu ta desea di haya informacion. Por yama Nathalie Tromp na 582-0088 of 582-0089. Por e-mail tambe na This email address is being protected from spambots. You need JavaScript enabled to view it. of bishita e pagina di Facebook.
CMB y CFCA kier yama danki na antemano na tur esunnan cu duna man den forma e adultonan di futuro y kier desea Aruba henter un aña 2023 yena cu amor incondicional.
