ORANJESTAD (AAN): E ta parce ainda di ta un fayo di computer, pero esaki a afecta sistema di Agencia FAA di Merca cu ta suministra informe via e sistema di NOTAM (“Notice to Air Missions”) cu ta duna informacion di seguridad na tur tripulante di vuelo prome cu nan subi nan avion. E fayo a cuminza presenta su mes Diaranzon den oranan di marduga.
Y pesey mes, Diaranzon mainta pa 8:20 am (ora di Aruba), a emiti un ordo pa tur
ATC Center rond Merca, cu ta bay ground tur vuelo. Ningun vuelo mas mag di subi, te cu proximo aviso.
Esaki a crea un caos rond di Aeropuertonan na Merca! Ya pa 9:50 am (ora di Aruba), nan tabatin 4.000 vuelo na tera wardando luz berde pa subi. Nan a keda abao na tera, mientras cu FAA a traha pa restablece e sistema bek.
Te banda di 10:00 am (ora di Aruba), porfin FAA a elimina e ground stop aki, pero ya caba el a produci un caos pa miles di pasahero, y crea un efecto di domino cu a impacta Aeropuertonan di Merca pa varios ora despues, incluyendo algun Aeropuerto den exterior.
Algun aerolinea a haci analisis y na final a djis dicidi na cancela varios vuelo. Otronan a djis wordo poni riba retrazo, cu e speranza cu e fluho di vuelonan lo por normaliza e logistica di pone vuelonan ey despues toch den aire.
Vuelonan e ora a cuminza bula bek cu avionnan den rij wardando turno pa lanta. Pa 1:00 pm (ora di Aruba), ya tabatin mas di 7.100 vuelo retraza, y mas di 1.100 vuelo cancela.
Durante e ground stop, toch FAA a sigui duna prioridad na vuelonan medico. E ground stop aki tampoco no a impacta operacion militar na Merca.
Congestion pisa a bin despues: Debi na e congestion pisa, FAA a dicidi na duna luz berde pa vuelonan di Newark Liberty Airport y tambe Atlanta Hartsfield-Jackson bira esnan prome pa lanta vuelo, prome cu operacionnan gradualmente a bay bek na otro ciudadnan rond di Merca.
Dia a sigui asina, y atardi ainda tabatin varios ground delay na entre otro Charlotte Douglas International Airport na North Carolina, cu ta un di e hubnan mas grandi di American Airlines.
Departamento di Aviacion di Chicago a bisa cu e ground stop na O’Hare y tambe Midway a wordo elimina, pero ainda tin hopi retrazo di vuelonan, y algun aerolinea simplemente a opta pa cancela algun vuelo.
E cancelacionnan aki ta ser tuma, debi cu congestion aereo ta uno caminda aerolineanan no tin control riba dje. E situacion lo pone e companianan sigui haya mas problema despues cu nan schedule di vuelo.
Riba Diaranzon, e espacio aereo riba Merca tabatin planea di mira 21.000 vuelo take-off. Mayoria di nan ta vuelonan domestico, y entre nan como 1.840 vuelo internacional cu ta suppose di yega Merca.
Un asociacion di aerolineanan Mericano, a bisa cu e ground stop a causa retrazo operacional masha significante mes. Y ta tur aerolinea grandi na Merca tin vuelo cu a wordo cancela.
Expertonan di aviacion civil, no ta corda si den pasado un fayo di computer di e magnitud aki a yega di crea asina hopi caos. Algun di nan a compare cu e shutdown di espacio aereo riba Merca ora cu e atakenan terorista di September 2001 a cuminza.
De vez en cuando tabata topa cu problemanan local paki-paya, pero esun di Diaranzon tabata hopi significante na nivel di historia.
E prome informe cu pasaheronan y prensa a haya sa di e problema di FAA tabata banda di 7:30 am (ora di Aruba). FAA a keda duna update cada mey ora despues.
Mientras cu Cas Blanco na Washington na comienzo a bisa cu no tin prueba cu ta un atake cibernetico a socede, toch President Joe Biden a bisa “nos no sa”, y a bisa prensa cu el a duna ordo na Departamento di Transporte pa investiga e causa di e interupcion.
Biden a bisa cu el a haya update di Transportation Secretary Pete Buttigieg, kende a bise cu ainda nan no a logra identifica kico a bay robez.
Tin di corda cu esaki tabata un “ground stop”, pues vuelonan nobo no tabata por a subi. Pero esnan ya den halto por a sigui bula normal. Pues avionnan yegando Merca di exterior, tambe por a sigui bula y ateriza normal.
Efecto riba Aruba: E ground stop aki a crea un efecto di domino, specialmente e vuelonan cu ta conecta cu otro den oranan di mainta. Pesey mes e vuelonan for di Merca rumbo pa Aruba a tarda pa sali. Y ora cu porfin nan tur a lanta, ya tabata basta laat.
Vuelonan cu a yega Aruba cu hopi retrazo, mas cu claro a sali bek cu hopi mas tardanza.
Vuelo di Delta Airlines di 2:10 pm rumbo pa Atlanta, a lanta vuelo casi 2 ora despues, pa 4:08 pm.
Vuelo di American Airlines di 2:50 pm rumbo pa Philadelphia, a lanta vuelo te 4:11 pm.
Vuelo di Southwest Airlines di 3:00 pm rumbo pa Orlando, a sali despues di 6:00 pm.
Vuelo di Delta Airlines di 3:15 pm rumbo pa Boston, a sali te como 4:27 pm.
Vuelo di United Airlines di 3:30 pm rumbo pa Newark, a sali te despues di 6:00 pm.
Vuelo di American Airlines di 3:45 pm rumbo pa Charlotte, a sali casi 6:50 pm.
Vuelo di American Airlines di 4:05 pm rumbo pa Miami, a sali te 5:10 pm.
Vuelo di Delta Airlines di 4:43 pm rumbo pa New York, a sali te 6:55 pm.
Solamente e vuelonan cu normalmente ta yega atardi na Aruba, a yega basta na tempo, y ta poni cu nan lo regresa Merca hasta on-time.
