Club Kibrahacha a celebra 40 Aña di existencia

ORANJESTAD (AAN): Dia 9 di september ultimo, Club kibrahacha a cumpi su 40 aña.

Durante henter un siman nan tabata tin diferente actividad pa nan miembronan. Entre otro, e cabayeronan a pela cerca barbero señor Alex y e damanan a corta cabey cerca señora Rosa. Tambe enfermeronan di Ambulance / Imsan a presenta na e club pa check presion y sucu di e miembronan. Aruba Vicion Center tambe a participa na e siman special aki y a check presion di wowo di miembronan. Tabatin varios wega entre otro, bingo, domino y Bon cu ne.

            Diabierna tawata e clausura di e siman “Na caminda pa celebra 40 aña di Club kibrahacha’ cu un bunita fiesta cu decoracion y bisti cora, color di Ruby.

Na e ocacion, Pader Juancho a haci un oracion y a parti su bendicion.

Tawatin presentacion di Eltienne Yarzagaray cu su cancion “ Bo ta Santo”. J- Vyôn Besselink, un hoven di apenas 8 aña a presenta su Ranchera cu a cay masha gusta mes y Robert Maduro a laga tur presente los e pianan.

Tambe por a cera conoci cu e directora nobo di Club Kibrahacha, señora Janely Nicolaas kende a gradici tur persona cu for di inicio di e Club a yuda, traha y coopera pa crecemento di e club. A gradici señor Eric D’Arnault, Rotary Club Aruba, Raad van Toezicht y e directiva y staff cu a traha durante e 40 añanan di e club.