ORANJESTAD (AAN) -- Señor Clifton Ling, kende hunto cu su rumannan a tuma over e negoshi di su mayornan a conta e historia di yegada di su famia for di China na Aruba na 1930.
Tabata durante di e decada 1920 cu China tabata un republica nobo, despues di 2000 aña di dominio imperial. E pais tabata enfrentando retonan enorme cu nan economia, politica y bida social. China a keda devasta pa un guerra civil entre Kum Ming Tong (KMT) encabesa pa Chang Kai Shek y e Partido comunista Chines (CCP) bow mando di Mao Zhe Dong, cual doctrina a prevalece te cu awe. Segun e censo di e tempo ey, China tabata conta cu un poblacion di solamente mei million habitante. Den e decada ey, China a conoce un periodo di hambruna causa pa caos politico y un secura immenso. “Mi Papa a nace den e aldea chiquito di Leelong cu awe ta un bario di e metropolis Shenzhen, e cuidad fronterizo entre Hong Kong y China. Siendo e yiu mayor di un famia di 10 yiu e tabata esun cu a wordu encarga pa haci e biahe pa exterior cu e speranza pa logra miho futuro”, asina el a descubri Aruba.
Sr. Clifton Ling a sigui conta durante su discurso cu e caminda pa realiza e buki tabata basta turbulento pa motibo di e tragedia di nan yiu homber menor Jordan, pa kende nan ta dedica e obra di e buki y tambe pa e fundacion bow su nomber. “Un danki ta bay na nos yiu homber Dustin y su grupo di
amistad di Caribe Hulandes biba na New York - Big Apple cu a establece contacto cu e editor y publicista Willy Wong cu tabata tin gran conocimento di e material y acceso na e archivonan universitario den e region. Asina nos por a compila e historia di mi grandinan, e viahe, e documentonan y potretnan cu ta sincroniza cu e texto skirbi den e buki. E ta simplemente un historia di un imigrante cu kier a busca su futuro sin conocimento kico esaki lo trece den un mundo nobo aki, na otro banda di e laman inmenso. Un danki special ta bay na tur personanan y instancianan cu a contribui den cualkier forma cu por a conduci na e logro aki awe. Manera mi a menciona prome, e buki ta dedica na JLF y e fondonan recauda aki ta bay pa e fundacion. e bukinan lo ta obtenibel den librerianan local “Nos ta spera cu e comunidad di Aruba les’e y goza di dje!”, Clifton Ling a conclui.
E prome ehemplar di e buki a ser entrega na director di Archivo Nacional Sr. Raymond Hernandez.
