Ghislaine Koeiman a relata:
*E aña aki esnan cu a participa ta gradua tambe
ORANJESTAD (AAN)—Fundacion Famia Planea Aruba (FPA), ta lanza su campaña “Ami ta dicidi” 2025 cu e aña aki tin e nomber di “Class of 2025” mirando cu ta e ultimo edicion di “Ami ta dicidi”, despues di seis aña cu nos a haci esaki, Ghislaine Koeiman a duna di conoce.
Esaki ta e aña cu nan ta gradua di “Ami ta Dicidi” y esey por mire tambe den e clip cu nan a trece cu e campaña aki, Ghislaine a comenta.
El a agrega cu mirando cu esaki ta un campaña di cambio di comportacion, semper FPA ta keda evalua e hobennan. “Na cuminzamento nos a bin cu e campaña p’asina empodera e hoben cu ta su choice pa e dicidi kico si y kico no.
“Durante añanan nos a keda mira kico ta pasa, kico ta biba abao di e hoben, y keda adapta na esaki, ya cu nos a yega na e momento aki, caminda cu e hoben ta bisa nos ‘ok, mi a tuma un decision na momento ey cu enberdad mi a ripara cu no ta esun corecto y mi a cay den un depresion. Kico mi ta suppose di haci?’ Awo, cu esun aki nos ta empoderando e hoben pa kere den segundo oportunidadnan, sin cu tin cu busca ayudo profesional. No duda pa haci esaki, y sa tambe cu Famia Planea tey pa nan por yuda”, Ghislaine Koeiman a bisa.
El a sigui bisa cu mas ainda cu FPA tin nan counseling cu e hobennan por bin cerca nan, nan ta sinta combersa y guia nan den kico pa haci.
“E aceptacion bao e hobennan tabata hopi bon, Bo por ripara e efecto na momento cu nan mes ta bin akinan despues y bisa ‘ok, despues di e presentacion, mi a bira mas conciente di cierto cosnan y mi kier mas informacion’, Ghislaine a expresa.
El a splica cu locual FPA ta clausurando e aña aki, ta mesun cos cu ora e hoben ta caba scol e ta gradua y esey tambe ta bay pasa den e tayernan di trabao. Nan ta bay tin un graduacion. “Esnan cu kier sa kico esey ta, book e tayer di trabao pa locual ta scol pa e hoben, pa gradua tambe cu locual ta: Ami ta dicidi”, señora Koeiman a expresa.
El a comenta cu reto di mas grandi ta ora di acerca e teenagers pasobra nan ta den un edad cu nan ta bisa cu nan sa tur esey caba. E ta bisa e hobennan pa corda cu no tur cos cu nan ta wak online ta corecto of haya sa unda nan por bay pa haya informacion corecto.
