ORANJESTAD (AAN): E di seis edicion di Playa Film Festival lo tuma luga un biaha mas na Caribbean Cinemas.
Enfocando e aña aki riba e resultado di Studio Caribe, un proyecto di Nederlands Filmfonds cu a finalisa cu diferente peliculanan cortico tanto di Aruba y di Corsou.
Durante e presentacion di diahuebs 27 di augustus e publico por disfruta di dos produccion di Aruba, e prome Adrift Wak Leau di Velvet Zoe Ramos y E Peso di Mundo di Juan Francisco Pardo y di Corsou Mane Hombu di Ango Laurens. Hunto cu e peliculanan aki lo tin preview di dos peliculanan cortico cu ta ilustra kico tur ta disponibel durante e festival e aña aki. E anochi di diahuebs lo tin un sesion di pregunta y respuesta hunto cu e cineastanan despues di e presentacion.
Riba Diasabra 28 di Augustus, Playa ta presenta su categoria mas gusta ‘Kingdom of Shorts’ un coleccion di peliculanan cortico di ficcion. E seleccion di e aña aki ta consisti di Fort Buku di Loëlle Monsanto, Hulanda. Fort Buku a wordo selecciona pa e panel di hurado pa ricibi e premio di Miho Pelicula di Kingdom of Shorts Premio Hurado. Otro seleccionnan ta On the Eve/Bispu di Elizabeth Francisco di Corsou, Hobi di Aramis Garcia Gonzalez, Hulanda. Tambe The Day I Met You, Corsou y A Mother’s Touch di Hulanda.
E competencia di School Short Story lo ta disponibel riba diasabra atardi 29 di augustus conhunto cu ripiticion di e categoria di Kingdom of Shorts. Durante e School Short Story por wak e trabaonan di e studiantenan di Maria College Mavo cu ta conta over nan amor pa Aruba. Diasabra anochi ta lo tin ripiticion di e categoria di Studio Caribe.
E aña aki e festival ta introduci e posibilidad pa mira peliculanan online completamente gratis. Un seleccion amplio di peliculanan di largo y cortico di ficcion y documentario ta disponibel online durante e festival pa e publico global por mira y vota pa e premio publico. Tur informacion, e programa y horarionan ta disponibel riba playafilmfestival.com.
