Cincuenta studiante a obtene e certificado di Academic Foundation Year di Universidad di Aruba

*Esaki ta e tasanan di graduacion mas halto den historia di e programa

ORANJESTAD (AAN): Academic Foundation Year di Universidad di Aruba a celebra su di dies klas graduando dia 7 di juli 2026, durante un ceremonia den Chapel di Universidad di Aruba. Cincuenta studiante a obtene e certificado completo di AFY, representando un tasa di finalizacion di 79.3%—e tasa mas halto den historia di e programa.

E resultado ta representa un aumento significativo compara cu e record anterior di 62%, un mehoranza di mas cu 17 punto porcentual. E cohorte di 2025–2026 a cuminsa cu 63 studiante. Ademas di e 50 studiante cu a obtene nan certificado, cuater studiante a completa e aña mediante e trayecto AFY Explore, un studiante a transferi pa un universidad na Hulanda, y un studiante a transferi pa un programa di bachelor na Universidad di Aruba. Hunto, 90% di e cohorte original a obtene e certificado di AFY of a identifica un siguiente paso productivo mediante e programa.

“E logro aki ta refleha e compromiso y perseverancia di nos studiantenan, como tambe e cuido, expectativanan halto y sosten cu henter e team di AFY a ofrece,” coordinador di e programa, Sean Holiday a bisa. “E studiantenan aki a haci hopi mas cu completa un serie di curso. Nan a desaroya e confiansa, independencia y sentido di direccion cu nan mester pa tuma e siguiente paso den nan educacion.”

Graduadonan di AFY lo sigui nan estudio na Aruba, Hulanda, Costa Rica y otro destinacionnan internacional. Algun di e institucionnan confirma ta Universidad di Aruba, The Hague University of Applied Sciences, Breda University of Applied Sciences, Amsterdam University of Applied Sciences, Saxion University of Applied Sciences, Avans University of Applied Sciences, HAN University of Applied Sciences, y UCIMED na Costa Rica.

E studiantenan lo sigui programanan den derecho, politica publico internacional y liderato, negoshi, fisioterapia, quimica, medicina, maneho di turismo, trabou social, accountancy, y organisacion, gobernacion y maneho.

Durante e ceremonia, AFY tambe a reconoce logro academico sobresaliente, liderato, asistencia y crecemento personal. Brandon Peterson, Jordan Servud y Trent Ternal a ricibi e Perfect Attendance Award pa a atende tur nan klasnan na tempo durante henter e aña academico. Jordan Servud a wordo reconoce pa completa 97 Credito Europeo—e cantidad mas halto den e cohorte—mientras Aylen Cáceres Martinez a obtene e promedio academico mas halto, cu un 9.2 di 10. Diesdos studiante a gradua cu distincion Cum Laude.

Andrea Elisa Contreras Oduber a wordo reconoci pa su servicio como representante studiantil di e cohorte. Dayna Abigail Albertus a ricibi e AFY Bridge Builder Award. E premio ta honra un studiante cu a demostra crecemento personal excepcional door di acepta reto, reflexiona riba su experencianan y construi un brug entre unda e studiante a cuminsa y e persona cu e ta birando. E oradornan studiantil Daniëlle Stephany Geerman y Kylie Josephine Lance a dirigi palabra na e klas graduando, reflexionando riba resiliencia, comunidad, curashi y e transicion pa un siguiente etapa den nan bida.

E logronan di e klas graduando a bay mas leu cu e rekisitonan minimo di e certificado. Studiantenan mester a obtene por lo menos 60 Credito Europeo, equivalente na aproximadamente 12 curso, pero e graduadonan a obtene un promedio di 69 credito. Nan a mantene tambe un promedio di asistencia di 91%, mas halto cu e rekisito di 80% di e programa.

Estableci na 2016, Academic Foundation Year ta un programa pre-universitario di un aña, full-time, diseñá pa crea un brug entre scol secundario y educacion superior. E programa ta combina preparacion academico, desaroyo di idioma, orientacion di estudio y carera, guia academico personalisa y oportunidadnan pa explora diferente disciplinanan universitario.

Universidad di Aruba ta felicita e Klas di 2026 di Academic Foundation Year y ta reconoce e famianan, docentenan, conseheronan academico, miembronan di personal y partnernan universitario cu a sostene e studiantenan durante henter e aña.