Cinco POH lo specializa den salud mental y firma contract cu WGK

Shantal Palmer a splica den conferencia di prensa:

*E prome grupo den historia di salud na Aruba

*Entrante 1 September 2024 lo inicia nan opleiding 

ORANJESTAD (AAN) – Shantal Palmer, di Stichting Wit Gele Kruis Aruba (WGK), a hiba palabra, den  un conferencia di prensa reciente, den cual a celebra un ocasion hopi special, considera un evento pionero pa Aruba. Esaki ta e firmamento di contrato cu cinco POH cu lo specializa den salud mental.

“Un ocasion cu nos por yama un evento pionero pa Aruba. Anto si. E tema di Praktijke Ondersteune ta uno conoci caba na Aruba. Sinembargo awe, ta e prome biaha den e historia di sector medico di Aruba, cu hunto cu Stichting Wit Gele Kruis nos lo firma contrato cu cinco Praktijke Ondersteuners, cu lo haya na final di dia, un anotacion special, motibo di nos orguyo awe mainta, ta e hecho cu cinco POH ta bay sostene nos tereno den e ramo di salud mental” Shantal Palmer a señala.

El a sigui splica cu entrante 1 di September 2024, e cinco POHs aki, no solamente ta inicia un carera nobo, sino cu ta e prome grupo na Aruba, cu ta drenta e trayectoria di formacion, como specialista den e ramo di salud mental, via e Instituto di “Educacion di RINO Zuid Caribbean.“Unda anteriormente, Aruba a conoce e POHs somatic, cu ta yuda ora nos tin un dolor fisico na nos curpa, awo Aruba ta ser conoci tambe cu enfermeranan specializa tambe riba tereno di salud mental.  Nos asina yama Praktijke Ondersteuners GGZ. Esta, enfermera specializa cu lo apoya e docter di cas den orientacion y tratamento di personanan cu problema psicologico, psicosocial of psicosomatico” Shantal Palmer a relata.

POHs den ramo di salud mental lo tin e funcion di  señala, coordina y interveni hunto cu e pashent pa aclarea e keho of sintomanan, y ehecuta un plan di tratamento. Tur esaki bao responsabilidad di e docter di cas pero cu nan propio compromiso.

“Tambe e PHs GGZ ta traha preventivamente. E ta identifica y interveni cu e meta di evita interferencia innecesario of recaida. Pero mas cu claro, ora ta necesario e Praktijke Ondersteune GGZ, lo percura pa referi na e siguiente profesional den ramo di salud mental”, Shantal Palmer a conclui.