Cifranan di morto na Aruba door di Covid-19 a subi na 41

Na Colombia tin 18 persona den Cuido Intensivo

ORANJESTAD (AAN): Segun resumen di diabierna, 65 persona a recupera y un total di 45 caso nobo di COVID-19 a keda registra cual 3 ta no-residente y 42 ta residente.

E cifranan aki ta representa un 'Positivity rate' bou di residentenan di 17%.

E cantidad di casonan activo di COVID-19 ta 566 y cantidad di fayecidonan relaciona cu COVID-19 a aumenta na 149 cu morto di un residente. Forsa na famia di e fayecidonan.

Datonan ta ilustra casonan nobo di COVID cu un average semanal di 55 caso pa dia y un averahe di 'positivity rate' semanal di 23% pa dia.

HOSPITAL 

Actualmente na Aruba tin 52 persona interna debi na COVID di cual 12 ta den ICU y 40 riba piso general y na Colombia tin actualmente 18 persona den Cuido Intensivo. 

DATONAN

For di comienso di juli cu DELTA a haci su introduccion na Aruba por observa cu lamentablemente 41 persona a perde e bataya contra e virus di COVID-19 di cual 6 tabata vacuna y 35 no tabata vacuna.

Den e graficonan adhunto di awe por observa e cantidad di 'opnanes' den hospital desde comienso di juli.

Por mira cu for di comienso di Juli, e cantidad di personanan interna cu no tabata vacuna ta 184 (81%). Tin 36 totalmente vacuna (16%) y 6 parcialmente vacuna (3%).