Mediador Anselmo Pontilius ta subraya:
- Hopi trahado ta reclamando ahuste salarial
ORANJESTAD (AAN) Den entrevista cu DIARIO, Anselmo Pontilius, Mediador di Gobierno, a menciona cu na 2023 tabata tin hopi referendum pero di parti di su trabao como Mediador, na 2023 tabata tin menos mediacion cu na 2022.
El a mira cu den e añanan 2022 y 2023 hopi Contrato Colectivo a keda cla, y den e casonan di mediacion tabata tin casonan individual cu el a atende. Pero e aspectonan mas importante cu el a mira ta cu den empresanan estatal importante pa nos Pais, manera WEB Aruba NV, NV Elmar, APA, Triple A, ATA, ANSA y e no a confirma Setar NV pasobra nan ta hopi leu, e sindicatonan concerni, a yega na un contrato colectivo cu nan. Pontilius a agrega cu logicamente a keda pendiente cu Post NV, Arubus cu ta den situacionnan mas complica y ademas na Serlimar.
Mediador Pontilius a duna di conoce cu na Post NV, e partidonan ta na mesa. Mescos pa loke ta Arubus.
“Mi a scucha e minister bisa cu nan ta creando algun espacio pa por mehora e situacion di e trahadornan, apesar cu e companianan ta den un situacion basta preocupante”, el a señala.
El a subraya cu en todo caso e trahadornan ta reclamando, manera na tur caminda, con e costo di bida a afecta nan entrada y e trahadornan ta pidiendo un ahuste den nan salario.
“Nan no por sin mas cu e trahado ta exigi aumento salarial, sino cu ta evidente; nos a mira cifranan di CBS con e costo di bida ta afecta e entrada di e trahado. Esey ta evidente. Aruba no ta un excepcion y e cifranan a afecta entrada di e trahado formalmente”, Pontilius a remarca.
Encuanto sector priva, Pontilius a sigui splica cu FTA, por ehemplo, a negocia cantidad di CAO den hotelnan, y na unda no tin contrato colectivo, por wak cu algun doño di trabao ta copia un poco loke trahadornan a logra den contratonan colectivo na e otro hotelnan.
El a indica cu e preocupacion ta keda e demanda pa trahado (pues falta di trahado) na diferente sector.
