Biden lo sigui proteha Citgo pero vindishi ta cuminsa otro siman
*Tempo ta duna DIARIO razon di a opone fantasia politico di Citgo
ORANJESTAD (AAN) — Cu Aruba ta goza di un bendicion special, ta e conclusion sin mas den e actual desaroyonan internacional cu DIARIO ta atende hunto cu informantenan experto cu a haci posibel, pa na 2018 DIARIO por a desenmascara uno di e pio aventuranan politico cu Aruba a conoce.
Na Juni 2016, despues cu Reino Hulandes a interveni den e situacion finaniero di Aruba cu a wordo pusha den estado di bancarato dor di Gobierno Mike Eman, e bienestar economico di Aruba a wordo pone den man di e Presidente di Venezuela, Nicolas Maduro cu un acuerdo firma entre ex Prome Ministro di Aruba, Mike Eman, y Presidente Nicolas Maduro pa Citgo, cu mester a percura pa reapertura di e refineria di Aruba.
Maestria politico a keda desplega na Aruba, cu a wordo ciega cu promesanan di un futuro di oro cu entrada di Citgo, e baca di lechi di Nicolas Maduro na Merca.
Na e momento cu Pueblo di Aruba tabata baila riba e musica politico di Gobierno Mike Eman y Regimen Nicolas Maduro, DIARIO a lanta para pa splica Pueblo di Aruba kico realmente ta Citgo, cu finalmente mester a destrui e soño falso y ilusionnan di Aruba cu a base di e herencia finaniero di Gobierno Mike Eman, na man di Reino Hulandes mester a tuma medidanan pisa prome cu Pandemia Covid-19 a bati na porta.
Tempo awe ta duna prueba di ta e mihor maestro, mientras na Merca un situacion desconoci ta desaroya.
Gobierno Mericano a dicidi Diamars cu e ta prolonga su proteccion di Citgo contra instancianan cu e compania debe te April.
No ta prome bez cu Gobierno Mericano ta proteha Citgo contra un ehercito di persona cu ta busca nan placa pa debenan di Venezuela y di Citgo.
Den e caso aki, Gobierno di Merca a interveni na momento culminante pa Citgo cu otro siman lo ta vindishi na Delaware.
E decision di US Treasury Department no por stop, e realidad cruel di Citgo pa Pueblo di Venezuela, ya cu tin un decision di Corte di distrito di Delaware cu ta haci cu otro siman vindishi di propiedadnan di Citgo ta haya su inicio.
Na un momento historico pa sector petrolero mundial, cu den loke ta e ultimo etapa di grandeza economico di petroleo ta trata di haci ganashi necesario na caminda pa fin di petroleo, Pueblo di Venezuela ta confronta e momento, cu uno di su posesionnan mas grandi den exterior, cu ta Citgo na Merca, ta wordo bendi pa paga debenan.
Un situacion serio ta presenta su mes no solamente pa Pueblo di Venezuela pero tur compania, trahadornan y instancianan cu tin relacion comercial cu Citgo.
Un situacion cu ya tabata bibo na 2014, ora ya entre otro Valero, cu a pone fin na su negoshi na Aruba, tabata riba lista di interesadonan den compra di Citgo.
Awe informacionnan ta papia di menos interes di parti di Valero, pero si di e angustia total di Pueblo di Venezuela mientras segun Orden di Corte na Delaware, durante e prome lunanan di 2024, e compania Citgo lo mester conoce un doño nobo.
Informacionnan cu ta alcansa sectornan financiero y mundial actualmente, ta duna motibo pa Aruba cuminsa explora, si no mester cambia leynan cu sin mas ta haci posibel pa politica barata hinca Pueblo den e desastre economico y financiero, pa cual Pueblo di Aruba mester paga awe.
DIARIO por duna testimonio di e realidad na 2018 na Aruba, ora informantenan clave riba tereno economico y financiero mundial, a exigi DIARIO bati alarma na momento cu ni sikiera Banco Central di Aruba por a duna splicacion debido na Pueblo di Aruba den su relatonan pasobra tabata desconoci kico lo a pasa cu economia di Aruba.
Awe uno di e hazañanan politico mas grandi den Historia di Aruba, cu tabata entrada di Citgo na Aruba, cu a bira asilo politico pa figuranan persigui na nivel internacional, ta exigi Aruba puntra su mes, con por evita ripiticion di loke a pasa na 2016 ora trahadornan y comercio di Aruba, cu ya financieramente tabata hundi den un bancarota financiero, a wordo ciega dor di e proyecto Citgo.
Gobierno Mericano a evita cu gobierno di Nicolas Maduro por a haci y deshaci cu Citgo como su baca di lechi y a proteha Citgo contra benta.
Un situacion serio ta culmina na momento cu vindishi di Citgo a wordo ordena dor di Corte na Delaware y e grupo di Venezolanonan cu ta contra Nicolas Maduro kier evita esaki pa medio di intervencion di Gobierno Mericano.
Kico lo a pasa Aruba si Proyecto Citgo a bira realidad? Un pregunta cu ta keda pregunta pero cu si mester sirbi pa evita cu e drama financiero, economico y social di Citgo cu mester a pone Mike Eman riba trono, por haya ripiticion na un pais democratico.
