ORANJESTAD (AAN): Riba diabierna 19 di November CIBC First Caribbean a celebra dia internaCional di hende homber no solamente na Aruba pero internacionalmente.
Banco di region a enfoca riba “ Mihor relacion entre hende muhe y hende homber” mirando e crecemento durante lockdowns y isolacion di caso nan di violencia domestico.
Na Aruba a invita dos studiante di facultad di Academic Foundation Year di Universidad di Aruba pa sera conoci cu e industria bancario acompaña pa dos ehecutivo masculino di banco.
Sr. Giovanni Atencio (Country Head) hunto cu Corporate Manager Sr. Carlos Lopez y Sr. Christopher Habibe (Credit Officer) tabata e host nan di e dia aki y a duna e studiante nan un bon bista di tur e diferente rolnan y responsabilidadnan den banco.
A finalisa e mainta cu un lunch pa asina brinda e studiante nan e oportunidad di hasi diferente pregunta tocante e oportunidad nan como tambe obstaculonan di negoshinan na Aruba, esta e situacion actual.
Tambe a surgi e oportunidad pa intercambia storianan di “bida despues di Universidad di Aruba” mirando cu Sr. Lopez y Sr. Habibe ta ex alumno y pa esey a comparti nan experiencia nan den nan carera.
E dos studiante cu pa otro aña escolar lo sigui cu nan studio na Hulanda a haya e oportunidad aki uno interesante caminda por a network tambe y celebrando asina nan dia di hende homber.
https://diario.aw/categories/noticia/general/cibc-firstcaribbean-aruba-a-celebra-dia-internacional-di-hende-homber#sigProId7d8e3393e6
