Ministro Geoffrey Wevera divulga esaki
ORANJESTAD (AAN): Riba Diaranson durante un conferencia di prensa di Minister Geoffrey Wever hunto cu Sr. Moises Sanchez Manzueta, Vice-Consul di Republica Dominicana, a invita companianan local pa participa den un mision comercial pa Republica Dominicana.
E mision comercial aki ta un colaboracion hunto cu ProDominicana, Junta Agroempresarial Dominicana (JAD) y Consulado General di Republica Dominicana na Aruba.
E mision ta centralisa riba e feria internacional Agroalimentaria 2025, cu lo tuma lugar di 28 te 31 di mei 2025. Agroalimentaria 2025 ta e plataforma mas grandi di Republica Dominicana pa sector agroalimentario, bebida y tabaco, cu lo reuni mas di 250 exportadornan Dominicano. Durante e feria, lo tin presentacion di productonan como berdura, fruta, condimentonan, pasta, koffie, cacao, tabaco, cerbes, rum Dominicano y hopi mas.
Pakico e feria ta importante pa Aruba: E situacion economico mundial ta cambia constantemente, cu aumento di tarifanan riba importacion na Merca y otro paisnan clave. Aruba mester sigui diversifica su lazonan economico y explora opcionnan nobo pa importacion y inversion. Agroalimentaria 2025 ta un oportunidad ideal pa empresarionan Arubiano traha conexion cu negoshinan Dominicano, amplia nan red comercial y explora colaboracionnan nobo.
Entre otro, e feria lo brinda oportunidadnan pa comerciantenan pa explora posibilidadnan nobo di colaboracion y importacion a traves di reunionan y ronda di negoshi cu exportadornan Dominicano, conferencianan y presentacionnan riba e sector agroalimentario. Comerciantenan por experimenta y conoce e producto Dominicano directo di e origen.
Anochi informativo 13 di Maart 2025: Pa tur negociante y personanan interesa, Departamento di Asuntonan Economico ta organiza un anochi informativo dia 13 di maart binidero, na su oficina, cuminsando pa 6:30 pm. Durante e presentacion, lo brinda mas informacion riba e feria, e mision comercial y con bo por participa.
Participacion na e anochi informativo ta completamente gratis y sin compromiso. Bo por registra scan e QR code (medionan social) of manda un email na: This email address is being protected from spambots. You need JavaScript enabled to view it..
Ministerio di Asunto Economico ta invita tur empresarionan Arubiano pa forma parti di e oportunidad aki, pa fortalece nos comercio y amplia e posibilidadnan di crecemento economico pa Aruba.
Minister Geoffrey Wever a expresa su agradecimento especial na DAECI, Maria Dijkhoff-Pita, Sharon Meijer y Sr. Moises Sanchez Manzueta, Vice-Consul di Republica Dominicana pa nan esfuerzo den esaki.
