ORANJESTAD (AAN): Comite Npu – Nos Prohimo Uni encabesa pa Astrid Vries y Team ta masha contento cu nan por ta activo atrobe despues di 7 aña door cu Parke Mabon a cuminsa bay atras y a bay hopi atras sin haya atencion durante di e añanan ey.
E Comite di Bario hunto cu algun habitante durante di e aña a pidi gobierno pa duna atencion pero porfin na 2023 a haya oido y e parke a haya un aire fresco atrobe.
E parke ainda no ta completamente cla pasobra ainda mester duna e casita un bon spuit di awa, dal un verf, drecha coriente, pone luz tanto den e casita y tambe mester di luz na e cancha unda cu e hobennan y adulto por hunga zaal voetbal, haci deporte, nos por tene actividad, charla y mas ora cu solo baha y bira anochi iluminacion ta hopi importante.
Nan ta cla pa nan prome actividad cu lo bay ta Agricultura. Dia 10 di Juli ta bay tin un Charla di Agricultura y como orador tin Hensley Martina di Escuela Kohehe Corsow, Michael Lopez di Organic Paradise Aruba y tambe Romulo Geerman di Rumbo Ranch Aruba. Horario ta bay ta di 6 pm – 7 pm. Workshop di Argicultura ta cuminsa Juli 11,12,13 y 14. Horario lo ta 9 am – 11 am y 3 pm – 5 pm. Workshop di Agricultura no ta solamente pa bario di Mabon pero pa tur cu kier participa cu ta bibando pariba y pabao di brug (pueblo completo) ta bon bini pa siña.
Na educa e muchanan tocante di agricultura tin varios ventaha. Muchanan ta siña di unda alimentacion ta bin y lo compronde e problemanan di e alimentacionnan. Muchanan lo ta mas conciente di e medio ambiente. Muchanan lo sinti nan mes conecta na e Cunukeronan di Aruba.
Agricultura ta siña e muchanan responsabilidad y respet. Agricultura ta importante pasobra e ta proporciona un cantidad suficiente di alimento (comestibel) pa tur persona, den cual ta vital pa e humanidad por prospera.
Agricultura ta un mundo den su mes: tin un variedad Amplio di ideanan y tecnicanan pa compronde y siña. Na siña di actividadnan di agricultura ta contribui den gran medida na e crecemento di cerebro, ya cu e lo siña hopi tocante di e tera. e proceso di crecemento di e matanan ta inclui varios cos cu ta util pa siña na e muchanan.
Permiti cu muchanan por ta fuerte prepara pa enfrenta presion di grupo/presion di par. Kiermen enbes di siña e muchanan e balornan cu palabra, lo practica e balornan hunto cu e muchanan haciendo Agricultura.
