Ceremonia oficial pa cuminsa restaura Cas Veneranda den centro di Oranjestad

Awor ta cay bao Monumentenfonds

ORANJESTAD (AAN): Diamars atardi net prome cu bahada di solo, a tuma lugar un ceremonia special den Wilhelminastraat, na e edificio di ‘Cas Veneranda’, cu den pueblo ta conoci tin biaha como ex-Papiamento Restaurant.

   E atardi a conta cu maestronan di ceremonia, Larissa Bermudez y Anne Witsenburg, y nan a relata cu e ceremonia ta pa start oficialmente cu restauracion di Cas Veneranda.  E ta un edificio construi pa e conocido ‘Bouwmeester’ Dada Picus, kende via di su creatividad y experticio den construccion cumpli cu e deseonan di Federico Arends (mihor conocí como Machi) y Maria Veneranda Arends-Lacle. Pa construi e cas di nan soñonan cual nan a conberti den nan hogar pa varios aña y di cual nan nieto- y bisanietonan tabata presente sigur tin hopi recuerdo bunita.

   Esaki a bira un etapa importante di e proyecto di Cas Veneranda. Monumentenfonds ta bira doño oficial despues di e firmamento di e koopovereenkomst aña pasa.  A haya hipoteca di APFA, pa paga pa cumpra y e monumento lo haya su ‘pre-proteccion’ y lo cuminsa cu e prome parti di ehecucion di e proyecto: ‘e sloop’. Esaki ta un momento importante pa e famia pero tambe pa e demas partnernan y pa cultura di Aruba.

   E prome persona pidi pa dirigi palabra tabata Ministro Geoffrey Wever.  El a bisa cu Cas Veneranda ta un di e edificionan mas iconico di Aruba.  “Semper a duel mi cu e tabata den deterioro. Ora mi a bira Minister di Economia e restoracion di Cas Veneranda tabata un di nos prome proyectonan. Mi vision 'from day one' tabata pa crea e sinergia necesario pa subi cantidad di persona cu ta frecuenta den Oranjestad, y cu esaki, e restauracion di Cas Veneranda tabata un di e puntonan focal. Sinembargo, pa realisa esaki no tabata facil.”

   Ministerio di Economia a asigna fondo for di su mesun presupuesto pa inverti den e proyecto aki, y lo logra reubica e Departamento di Asunto Economico pa Cas Veneranda. E paso aki a haci e restauracion posibel. "Mi ta hopi contento cu despues di henter e esfuerso di e ultimo dos añanan awe nos por bisa cu e restauracion di Cas Veneranda ta cuminsa," segun Minister Geoffrey Wever.

   E renovacion ta refleha e dedicacion di e Ministerio di Economia, Comunicacion y Desaroyo Sostenibel pa inverti den centro di Oranjestad.