Ceremonia di reconocimento na honor di e 21 miho graduadonan di Aruba 2022

ORANJESTAD (AAN):  Diamars anochi den un esfera festivo na Boulevard Events Aruba, Women’s Club of Aruba a honra e miho graduadonan di pais Aruba.

E proyecto di ‘Student Award’ ta wordo organisa pa mas di 75 aña bou Enseñansa Secundario.

            Na yegada e mandatario di Enseñansa y Deporte acompaña pa su esposa sra. Dilailah Croes a wordo ricibi cu un caluroso bon bini pa presidente di e organisacion sra. Norma Brinkenberg- Spellen. Presente na e ocasion special aki tabata su Excelencia Gobernador di Aruba sr. Alfonso Boekhoudt y su distinguido yiu cu a presencia e momento special y unico den bida di e graduado. E graduadonan a traha hopi duro cu hopi esfuerso y dedicacion pa finalisa nan estudio exitosamente.

            Un total di 21 graduado di VWO, HAVO, International School of Aruba (ISA), IBERO American High School, MAVO, EPI, EPB, SPO, Avond HAVO y Avond MAVO a ricibi nan reconocemento como miho graduado di Aruba. Minister Endy Croes a felicita e graduadonan den nomber di Gobierno di Aruba y a expresa cu ta hopi orguyoso di nan logro. Loke cu boso a logra awe ta e resultado: di boso propio esfuerso, disciplina, dedicacion y determinacion.

            Durante anochi ir. sr. Edwin Jacobs, kende tabata miho graduado di aña 1985 y 1988 a duna testimonio di su experencianan y a duna un mensahe positivo na e miho graduadonan.

            Finalmente Minister Endy Croes ta gradici directiva di Women’s Club of Aruba cu un bunita proyecto cu sigur ta inspira y motiva e hobennan pa sigui studia. Alabes e mandatario ta felicita e miho graduadonan di Aruba, nos ta orguyoso di boso, hopi exito den futuro!