Ceque College a celebra cu atrobe nan ta e scol cu mihor porcentahe di graduado

ORANJESTAD (AAN): Durante un anochi cu yen ambiente y cara contento, alumnonan di Ceque College MAVO na Hato

tabatin motibo pa celebra!  Nan a bira un biaha mas e scol di MAVO cu e porcentahe mas halto di alumno cu a gradua, esta 98%.

   Di e 41 examenkandidaat di MAVO di e scol aki, ta solamente 1 a keda sin logra.   Pues 40 alumno tabata presente den Ballroom di Holiday Inn Resort pa asina busca nan diploma.

   Director Clay Shipley tabata hopi feliz cu un biaha mas su alumnonan a score asina halto den tur vak di e lesnan cu MAVO ta ofrece.  El a hiba un discurso elocuente pa splica e studiantenan, cu e meta di nan awor ta pa sigui purba yega te na halto den nan estudio.  E palabra principal aki ta ‘purba’, pa subi e piramide di educacion.

   Durante e anochi aki, a honra na comienzo e cuatro alumnonan cu a gradua mihor na e scol, esta Dominik O. Bitterling, Christian H. Aragon Vasquez, Renee A. Mujica, y Vilensca A. Andrade de Vargem.   Nan a haya un extra regalo di scol, y alavez na final a pose pa un potret hunto cu director Shipley.

   Riba escenario nan tabatin un blaas cu 98, pa mustra e porcentahe cu nan a logra pa examen.