Honra cu ATA ta forma parti di Wow Project:
ORANJESTAD (AAN) — CEO di Aruba Tourism Authority (ATA), señora Ronella Croes, a hiba palabra den e conferencia di prensa di WOW Project, unda el a destaca e importancia di un desaroyo responsabel riba tereno di turismo.
Ronella Croes a informa pakico e proyecto aki ta importante pa ATA. El a bisa cu un di e misionnan di ATA ta enfoca riba un turismo responsabel, y parti di esaki ta pone atencion na e proteccion di nos naturaleza y nos herencia cultural.
“Un di e aspectonan importante si nos sigui e caminda di un turismo responsabel; si nos sigui e caminda eynan nos ta actuando pro-activamente y activamente, na mitiga cualkier impacto cu por resulta di un situacion di ‘sobreturismo’. Esaki ta algo cu nos ta scucha hopi localmente, pero internacionalmente tambe”, CEO di ATA, Ronella Croes a señala.
Ronella Croes, seguidamente a anuncia ATA su colaboracion cu un proyecto cu e ta haya sumamente importante, pa yuda pa pone mas atencion riba proteccion di Aruba su recursonan natural y cultural.
“Pues, ta un honor pa forma parti di algo asin’aki. Y ta importante, mi por bisa tambe acerca cu, recientemente, pa ta mas exacto, Diabierna ultimo ATA a comparti, publicamente, su plan pa 2025. Un plan cu ta mara na su plan strategico di añanan cu ta sigui tambe, pues no solamente enfocando riba aña 2025. E plan aki ta disponibel riba www.ata.aw
Den e plan aki por mira hopi di locual mi a menciona di accionnan cu a wordo tuma, pero tambe kico mas lo wordo haci riba e areanan aki. Entre otro, e plan aki ta contene ocho punto cu lo yuda Aruba, y nos tambe, guia con pa mitiga e impacto negativo di sobre turismo pero tambe con nos por cana e caminda miho di un turismo responsabel y bao di esey, naturalmente, e aspectonan cu mi a menciona”, Ronella Croes a expresa.
El a agrega cu parti di e ocho puntonan ta encera, entre otro: cambio di nos maneho di comunicacion local, unda cu lo bira mas visibel pa e huesped pero tambe pa nos residentenan; kico cada persona por haci pa yuda proteha nos Aruba. Nos Aruba cu ta duna nan asina hopi como huesped, pero tambe na nos mes como residente. Kico nos tur por haci pa nos comportacion pa yuda guia nos proteccion den e direccion desea ”, Ronella Croes a subraya.
El a añadi cu e strategia di comunicacion no solamente como Aruba y como ATA, no solamente ta para eynan. “Internacionalmente, tambe, un cambio grandi lo ta cu prome cu e bishitante hasta scoge pa bin Aruba, ya caba e ta bay mira un Aruba internacionalmente cu ta bay papia mas, no solamente pa nos pero pa turismo y biahe en general, di e importancia di un desaroyo responsabel”, Ronella Croes a señala.
