*E nivel di servicio y bo reputacion ta baha
*Clientenan ta menos contento
ORANJESTAD (AAN)—E peligro ora no tin suficiente trahado pa duna un servicio optimal den e sector di turismo, ta cu e nivel di servicio ta baha, e reputacion como destino turistico ta baha, e ora ey e clientenan ta menos contento y, poco, poco ta resulta den un economia menos productivo.
Asina e CEO di Aruba Hotel & Tourism Association (AHATA), Tisa LaSorte a menciona den entrevista cu DIARIO. El a señala cu na Aruba tin dos problema: uno ta esun di turismo y otro e personanan cu ta purbando di asegura cu no tin sobre turismo, y cu nos naturaleza ta proteha. El a bisa cu nan tin razon.
“Pero loke mester haci ta bin cu solucion, prome cu nan bira hopi agresivo contra bo turistanan, manera por mira den otro pais. Di otro banda no tin suficiente trahado pa duna un servicio optimal. Kiermen, bo tin dos problema cu ta haci bo turismo un tiki mas fragil”, LaSorte a señala.
Tisa LaSorte a subraya cu servicio pa turista ta keda algo personal, y Aruba su economia ta basa riba servicio y hospitalidad. “Y hospitalidad ta basa fuertemente riba hende, y hende cu ta stima otro hende y cu ta busca solucion pa yuda otro hende”, LaSorte a remarca.
Tisa LaSorte a sigui bisa cu e hecho cu tres compania grandi di hotel ta bay habri, ta haci cu ainda tin mas demanda pa trahado y esey ta haci cu no tin suficiente hende pa ningun di tres, y ora tin asina hopi trabao un hende ta bay di un trabao pa otro, y e ora ey hopi compania ta keda sin suficiente trahado y e problema ta keda aumenta.
