Centro Kibrahacha preparando pa celebracion di 38 aña di existencia  

ORANJESTAD (AAN):  Centro Kibrahacha ta bay cumpli 38 aña di existencia y relaciona cu esaki ta bay tuma lugar un celebracion grandi Diabierna.

Lambrinos Barber’s Studio ta un di esnan cu ta bay aporta na e celebracion di nos grandinan y den un entrevista cu DIARIO propietario Alex Lambrinos a indica cu hunto cu su señora Esther nan a dicidi di corta cabey di tur e hendenan homber, mientras cu ta duna atencion tambe pa e huñanan di e hendenan muher, como tambe blow nan cabey.

Minister Ursell Arends di otro banda den un entrevista a indica cu e ta sumamente contento cu e atencion cu e adultonan mayor ta ricibi y ta bay sigui ricibi, unda cu nan cabey ta wordo corta y manteni, mescos cu ta trata por ehempel huña di e clientenan.

E mandatario a indica cu e ta bunita pa wak con Kibrahacha ta duna e adultonan mayor e oportunidad di mantene nan mes ocupa na bon manera, unda cu tin por ehempel hendenan cu ta traha obranan di arte.

“Mi ta kere tur esaki ta forma parti di e maneho y vision cu nos tin, pa tene nos adultonan mayor activo den nos comunidad, pa asina nan por biba un bida cu ta saludable unda cu nan participacion tambe ta sumamente importante”, segun Arends.

Mirando e aumento den e cantidad di adulto mayor den nos comunidad, e minister a indica cu lo delibera pa wak si ta necesario pa aloca extra fondonan pa yuda den esaki, pa nan no falta nada.