Centro di cuido di mucha ta keda un responsabilidad hopi grandi y tin su ‘kosten plaatje’

Sue Ann Ras, lider di Codigo di Proteccion:

ORANJESTAD (AAN) – Centronan di cuido di mucha ta keda un responsabilidad sumamente grandi na momento cu bo sa cu tin cu cuida mucha y e tin su costonan den dje, sigur cu si. Asina e Lider di Codigo di Proteccion, señora Sue Ann Ras a comenta, den entrevista cu DIARIO.

            “Aki na Aruba ainda nos no por a yega na un ‘kosten plaatje’ traa pa cuido di mucha. Mi ta corda cu nan a haci comparacion pa cu esey, cu ta bisa cu na Hulanda ta diez euro, anto nan kier compar’e cu 20 euro, pero eigenlijk 10 euro lo ta diez florin na Aruba. Bo no por compara apple cu pear”, Sue Ann a señala.

            Ras a acentua cu “eigenlijk, na Bonaire tambe nan ta papia di mas of menos diez dollar, y aki na Aruba ta papia cu, ongeveer, diez florin lo mester ta”.

            “Pero nos tin un estudio haci. E departamento di mucha y hoben kier drenta den dje, pa haci un estudio y wak cuanto un mucha ta costa por ehemplo na un parti educativo parti mainta prome, anto despues e parti atardi tambe, pasobra e ora ey bo por haya un bista mas real di e situacion”, Sue Ann Ras a indica.

            E dama a menciona cu ta mescos cu na scol unda cada un mucha tin un prijs. E prijs ta inclui e local, e salario di e docente, e materialnan cu e ta haya, y subsidio no tin na Aruba. “Kiermen con bo ta bay pidi subsidio si bo no sa ni cuanto un mucha ta costa den un centro di cuido. Pues, mester haci un investigacion prome” Sue Ann a señala.

            “Na 2020, cu Departamento di Hoben y Mucha cu tabata bezig ta lantando e momento ey, cu e no tabata ni oficial, semper a tene contacto cu e veld, na hopi ocasion. Nos ta informa nan via Boletin Informativo cada paso, nos tabata tin reunionnan di contacto y tur a bisa cu nan ta di acuerdo cu e ley y cu e mester drenta. Pero nan kier’ e den fase. Y nos a bisa nan cu e ta bay den fase tambe, vooral e fasenan cu nos sa cu ta mas desafiante, por ehemplo, e ‘kind leidster ratio’. Pero tin hopi factor cu ta haci cu cosnan por sosode”, Sue Ann a remarca.

            El a bisa cu por ehemplo, un leidster pa diez baby. “Ami ta admira nan pasobra ami no por ni cu un baby, corda cu diez. E ta un responsabilidad hopi grandi y mayornan mester ta conciente di esey. Con cu bay bin tin otro hende yudando bo lanta bo yiu, kiermen e tin su ‘kosten plaatje’. Kico e ta aworaki? Mi no por bisa pasobra e ta un average cu nos sa cu tin estudionan tras di dje haci”, Sue Ann Ras a remarca.