Centro di Bario Tanki Lender ta recaudando fondo pa yuda drecha e edificio

Nan ta organizando fiesta di club

ORANJESTAD (AAN): Fiesta di club ta bin bek!  Esey ta loke DIARIO a tuma nota di dje, y cu lo socede e fin di siman aki na Centro di Bario Tanki Lender situa na Tanki Leendert.

   Esey ta loke e simpatica Ray-anne Hernandez a confirma na DIARIO.  E ta president di Centro di Bario Tanki Lender.  E esencia principal di e fiesta ta, cu e ta bira un evento pa recauda fondo pa yuda e Centro mes cubri gastonan cu ta necesario pa mantenimeno y renobacion di algun parti.

   Hernandez a indica, cu e fiesta mes yama “Barak tin Fiesta” lo bay ta Diasabra 17 di September, cu ta un ‘Fiesta di Bon Ambiente’ di Diasabra anochi di 7:00 pm te cu 12:00 am.  Aki lo tin Robert Maduro y su Azucar Band, cu ta presentando, y lo tin Bar y Cushina bon surti.  Entrada mes lo ta gratis.

   Tur esaki pa cuminza trece bida bek den e Centro di Bario, y asina kier recauda suficiente fondo pa por drecha e Centro bek.  Tin di corda cu pa dos aña largo relaciona cu e Pandemia di Covid-19, e Centro no por a organiza ningun actividad pa publico tampoco.  Esey a pone cu pa 2 aña largo e Centro di Bario a keda practicamente cera, y un lugar cu no ta wordo habri pa hopi tempo, ta pone cu e lugar y edificio a bay atras.

   Aworaki e boluntarionan a  tuma tempo pa asina trata na drecha e lugar na mihor condicion cu nan por, y a haci esey riba propio forza.  Sinembargo tin mester di mas fondo pa por cubri extra gastonan cu ta encera compra di material.

   Esaki ta unda cu a dicidi na organiza e fiesta pa asina laga pueblo yuda nan, y yega na e fondo necesario cual tur ta pa un bon causa.  Di e forma aki sikiera, poco-poco nan por haci renobacion di e.o. un potchi WC aki, un porta aya, y asina lo por pone e Centro bek den un bon condicion y por wordo usa bek sin dolor di cabez pa pueblo di Tanki Leendert, y pueblo di Aruba en general.

   Enfoque pa futuro: Unavez cu e Centro di Bario ta bek full den top condicion, nan meta ta pa sigui enfoca riba nan nucleo, esta pa bira un centro social pa comunidad.

   Segun Ray-anne Hernandez, un di nan metanan ta pa introduci na e Centro, lesnan di musica pa mucha, hoben, y adultonan.  Tambe otro tipo di curso cortico pa mayornan tambe por desaroya nan mes mihor, y hobennan por haya otro habilidad di bida pa cu cosnan cu bo no ta haya na scol ni na Enseñanza pa Empleo, pero toch por adkiri tur esaki via curso na Centro di Bario.

    Toch nan kier pa e sala grandi di e Centro di Bario bay bek apto pa tene fiesta grandi, como cu den pasado esaki tabata un di e fuente grandi di entrada pa nan.  Ta hopi hende a yega di acudi na fiesta di bruid, fiesta di quinceñera, fiesta di bautismo, fiesta di ricibimento, y hasta fiesta di Sinterklaas na e lugar aki.   Pa esaki por socede bek, nan tin di percura pa tur e instalacion di baño y cushina ta full up to date.

   E costo di tur esaki: Centro di Bario Tanki Lender tabata e lugar principal unda hopi deportista tabata acudi pa hunga Futsal, y esaki ta poni den plan tambe.

   E parti pafo banda pariba ta wordo usa pa un scol priva cu ta duna les na hobennan cu limitacion.

   Ray-anne Hernandez a indica cu pa henter e edificio di Centro di Bario Tanki Lender keda den top condicion bek, lo tin di inverti como 100.000 Florin pa e renobacion.  Esaki ta inclui portanan nobo, como cu aworaki e portanan existente ta di fabricacion di palonan di mas di 20 aña bieu, pues nan tempo pa wordo reemplaza a yega.

   E cancha deportivo mes lo tin di bay cambia e superficie, como cu algun lugar por mira con raiz di palonan di mata a ‘pusha’ y a sali bin ariba, dañando full e veld.  E palonan di luz, y instalacion di iluminacion tin di wordo cambia, como tambe e tribunanan.

   E cura tambe ta contene parti cu ta di e construccion original di decada di 1950 cu awor si tin di wordo cambia.  Pasobra lo bo no kier pa muraya kentel y cay riba hende.

   Pa renobacion di full e cancha cu su muraya y luznan, ta mira un gasto di riba di 250.000 Florin.  Esaki kizas ta algo pa pone riba agenda pa aki 2 of 3 aña.

   Sinembargo pa awor, e urgencia ta pa e edificio principal pa enfoca riba dje.  Pesey tin e Fiesta di Club prepara pa Diasabra awor, y despues cada Diasabra nan lo kier organiza un actividad pa por sigui yuda recauda fondo.

   Si acaso publico kier haci un donacion na Directiva di Centro di Bario Tanki Lender, por haci esaki tambe.