Centro di Bario Noord a inaugura nan Speeltuin completamente renoba

E ta habri awor tur atardi pa publico

ORANJESTAD (AAN): Centro di Bario Noord a prepara un atardi special pa asina inaugura nan Speeltuin full renoba pa pueblo di Noord.

    E hardin di wega aki normalmente ta wordo usa pa e muchanan cu ta atende e creche di ‘Chikitin Bin Bin’.  Pero awor directiva di Centro di Bario Noord a tuma decision cu nan lo habri e Speeltuin aki tur atardi.

   Pues e ta habri pa publico acudi di Dialuna te Diabierna den oranan di atardi pa muchanan por diberti na un forma sano den aire libre.  Esaki a bira posible debi cu recien nan a ricibi un ‘Programma Leider’, señorita Ligia, kende ta haciendo un trabao fabuloso, y ta haci posible pa e Speeltuin por habri atardi, for di 4:30 pm te cu 7:30 pm.

   Na ocasion cu a habri e Speeltuin, a corona e mucha muher Xeena Dijkhoff como Reina Infantil di Noord pa siguiente Carnaval.

  Tambe a corona Prins Swing y Pancho Den Bashi, esta Maximus Fingal y Roychen Matos.

   Cu e Reina cu Prins y Pancho a realisa e re-apertura oficial di Speeltuin renoba di Centro di Bario Noord.  Animacion tabata den man di un Brassband.