Centenares di auto cu a ser laga atras na Wardanan di Polis a wordo destrui

ORANJESTAD (AAN): Manera a wordo anuncia den DIARIO, Cuerpo Policial di Aruba a duna un di dos oportunidad na doñonan di auto cu tin warda pa basta tempo na diferente Warda di Polis, pa bay busca nan bek.

   Polis a duna publico chens for di Dialuna 11 di April te cu Diabierna 15 di April, pa check nan auto cu ainda ta na Warda di Shaba, of na Warda di Santa Cruz, of na Warda di Balashi, of na Warda di San Nicolas.

   Bo mester bay cu documento pa proba cu e auto ta di bo, etc.

   Resultado di esaki ta cu tin hopi hende cu a djis ni reacciona y ta bisto cu nan no ta interesa mas den e autonan aki.

   Relaciona cu e cantidad di autonan den e diferente Wardanan di Polis y e propietarionan no ta busca nan vehiculonan, ley ta prescribi cu mester destrui e vehiculonan.

   No ta permiti tampoco pa den e proceso, pa ningun di e vehiculonan aki ta worde ‘getorno’ of ta desmantela piesa di parti di compania di towing of otro persona, ya cu semper tey presente representante di ley cu ta vigila henter e procedimento.

   Cu Heavy Equipment, a hisa e vehiculonan aki pone nan riba un lowboy trailer, pa asina a hiba nan pa e compania Daltra NV y worde machica, y ya ta djis hero bieu awor.

   For di Warda di Polis Shaba a bay cu 38 vehiculo, for di Warda di Santa Cruz a bay cu 78 auto, for di Warda di Balashi a bay cu 38 auto.