Cendemento di luz y decoracion di Seroe Jan Flemming a cumpli diez aña di existencia

A honra e memoria di señora Susana Flanegien:

*A dedica e anochi na señor Marlon Henriquez 

ORANJESTAD (AAN)  -- Cendemento di luz y decoracion di Pasco di Nacemento na Seroe di Jan Flemming a cumpli su diez aña di existencia y esey a wordo celebra den e fin di siman tras di lomba.

E Comision di Seroe di Jan Flemming y grupo di boluntario a haci un gran trabao, aunke no ta facil pa logra un meta grandi asina. Pero cu hopi determinacion a realiza actividadnan pa recauda fondo,  y asina a celebra e di dos lustro di e bunita iluminacion y decoracion di Jan Flemming.

A dedica e anochi aki den memoria di señora Susana Navas- Flanegien cu dia 16 di Maart di e aña aki a bay sosega den paz di Señor, y ken ta un persona hopi stima pa e Grupo di Jan Flemming y cu nan tabata yama Tanta Nita of Tantita.

Nan a recorda cu for di comienzo su persona a adopta un mata di kwihi, tur aña el a zorg pa decora esaki. Su aporte y amor pa Seroe Jan Flamming tabata inmenso, y awo cu su presencia fisico no tey mas, su yiunan lo sigui cu e tradicion. El a haya un respet di cariño y amor manera semper e habitantenan di e bario aki tabata tin p’e y e tabata tin pa nan. A tene un minuut di silencio pa su eterno descanso pa Tantica sosega na paz.

E aña aki a dedica e cendemento di luz na un persona hopi stima pa tur persona di Seroe Jan Flemming cu ta señor Marlon Henriquez. E ta un persona cu for di comienzo y durante e diez añanan aki a colabora cu cendemento di e luznan. Nan ta spera di conta cu ne hopi aña mas, dunando su contribucion grandemente na Seroe Jan Flemming.