Celebrando e di 75 aniversario di NV Elmar pa Aruba tin coriente stabil

ORANJESTAD (AAN): Riba e fecha manera awe, ta festeha e di 75 aniversario cu e compania NV Elmar a bira esun responsabel pa suministra electricidad pa e isla completo.

  Casi 3/4 di siglo unda e compania a sigui bay dilanti, bira un entidad serio y responsabel, y cu awendia ta na cabez cu inovacion y servicionan adicional pa henter comunidad.

   Historia di coriente: Esaki ta basa mas bien riba historia di coriente na Aruba.  Den bukinan ta indica cu desde 1923 te cu 1930, e rumannan homber A.J.P. y J. van Meeteren tabata encarga cu genera y distribui coriente den area di Oranjestad.  Nan planta di generator mes tabata den Windstraat, cu ta e caya panort di La Granja Oranjestad bay pabao.  Pero na aña 1931, John G. Eman a ricibi un concessie di 25 aña pa e haci suministro di coriente pa Oranjestad y vecindario.

   Pero e compania di Eman a bay despues na comienzo di 1950 den man di e compania di gas, Overzeese Gas- en Elektriciteitsmaatschappij N.V. (OGEM), kende a haya un concessie pa 50 aña.

   Pero e suministro di coriente a wordo tuma over dia 15 di November 1950 door di e recien crea Elmar, cu OGEM como accionista principal, y Gobierno como accionista minoritario.

   Na aña 1964, Elmar a limita su mes djis na distribucion di coriente, y asina a cera un acuerdo di suministro cu WEB Aruba NV.  Despues di esey, e bancarota di OGEM y e maneho di Gobierno di Aruba pa nan tin mas di bisa riba tur compania di utilidad riba e isla, a desemboca na 1990 den un tumamento over di nan tur bao di un solo holding company.  Di e forma ey dia 30 di Juli 1990, a crea Utilities Aruba NV.

   Distribucion: E coriente ta wordo genera primordialmente na planta di WEB Aruba NV, y solamente un parti chikito ta bin di e.o. Parke di Molina, y diferente Parke di Panel Solar cu tin na e.o. parkinglot di Aeropuerto, parke na Lago Heights, y diferente scol y edificio rond di e isla.

   Rond di Aruba, NV Elmar tin 7 sub-station.  Segun calculo, Elmar tin como 965 kilometer di waya colga den halto, y 1.170 kilometer di kabel bao tera.

   No ta solamente bao tera, pero hasta bao lama tin kabel di coriente cu ta pasa pa yega e.o. De Palm Island.

   Trabao di antes: Mayoria biaha antes, ta cu harnas special rond di curpa, cu spike special na zapato, tabata subi palonan di luz pa asina haci conexion nobo, of haci reparacion.

   Y esaki tabata algo cu muchanan den varios bario tabata gusta yega cerca y mira con e trahadornan di Elmar ta subi e palonan di luz aki.  Un admiracion total pa e muchanan.

   Felicitacion na NV Elmar, su staf y personal, e trahadornan incansabel cu di dia y anochi ta haci nan best pa comunidad keda disfruta di electricidad, incluyendo oranan extremo di marduga ora cu tin di haci reparacion urgente, y hasta mientras tin lamper cu strena ta cortando.

   E potretnan historico pa cortesia NV Elmar.