Celebracion y re-inauguracion di Plaza Hubert Lio Booi na Universidad

ORANJESTAD (AAN): Recientemente Prome Minister mr. Mike Eman a asisti na un anochi special na Universidad di Aruba y

a hiba palabra na e celebracion di 47 aña di Departamento di Cultura Aruba. Durante di e anochi, a tuma luga e re-inauguracion di Plaza Hubert Lio Booi na Universidad di Aruba.

   Durante su discurso Premier Eman a subraya e ambiente cual tabata uno memorabel, den presencia di famia Booi, caminda a duna honor na Lio Booi (QEPD) como e prome director di Departamento di Cultura na Aruba. Esaki den conexion cu e celebracion di e 47 aña di e departamento.

   “No por tin un miho forma pa para keto na 47 aña di establecimento di un instituto manera  Departamento di Cultura, cu hacie hunto y den presencia di espirito di Lio Booi”, den cada palabra, den cada letra, den cada aspecto di cultura di Aruba a resalta cada bes e palabranan di e poeta Booi, cu a keda marca den curason di e comunidad.

   Via su poemanan el a describi nos pais na hopi ocasion y inculca algo profundo den cada Rubiano, cu ta e conexion entre naturalesa y cultura, como tambe nos Fe y sentido di ser humano riba e baranca aki.

Un anochi di celebracion, honor na un baluarte y compromiso na nos suelo.