Celebracion henter Diadomingo pa Dia di Bonaire na CB Brazil

Pa yuda recauda fondo pa Club Bonaire

• Mester di riba 3 miyon Dollar pa renoba Club Bonaire 

ORANJESTAD (AAN): Hopi hende cu ta pasa den area di Club Bonaire na San Nicolas, por nota cu henter e cura y tereno ta den un ruina, e edificio mes ta ‘afgekeurd’, practicamente no por haci nada eyden como cu e lugar no ta adecuado.

   Sinembargo miembronan cu kier pa Club Bonaire regresa bek na su tempo di gloria, ta trahando duro pa asina logra haci esaki door di recauda fondo y mas.

   Gregory Goedgedrag a bisa cu e miembronan cu ta yudando ta haciendo esaki cu amor, y nan ta hayando sosten di algun persona di exterior.  E speransa tey cu instancianan local tambe por yuda nan pa trece Club Bonaire bek den forma bunita.

   Pa por trece Club Bonaire bek den un estado corecto bek, lo mester di un inversion di entre 3 pa 4 miyon Dollar.

   Por renoba e edificio existente y pone bek den standardnan di construccion di 2024?  Arkitecto- y ingenieronan ta bisabo awendia cu ta mihor bo basha tur cos abao y cuminza full di nobo, como cu e lo salibo mas barata.

   Pero tin di corda cu e edificio existente tin un balor historico y sentimental, y esey ta hopi mas importante.  Pues tin di bay evalua ainda con lo bay haci, esta sea kizas basha abao partinan di edificio cu ya no ta adecuado y safe, pa lant’e di nobo.  Of haci e renobacion completo.

   Plan ambicioso pa Club: Segun Gregory Goedgedrag, nan plan pa Club Bonaire den futuro ta grandi.  Den nan pensamento, e lo tin di bira un Centro multi-facetico cu ta cumpli cu tur exigencia di deporte, pa actividad social, cultural y artistico, pero tambe historico.

   “E intencion ta pa nos traha un Museo cu ta refleha e herencia, y pesey ta yamando e lugar caba Heritage Center Club Boneriano, pa por duna un imagen di e herencia cu a ricibi di antepasadonan, y tambe cu por duna un refleho di e mezcla con e Arubiano y e Boneriano, y demas islanan a uni y forma comunidad.

   Celebra Bonaire: Relaciona cu celebracion di Dia di Bonaire, pa Diadomingo 8 di September, lo cuminza cu un Santo Sacrificio di Misa pa 10:00 am na Misa Sta Teresita na San Nicolas.  Posteriormente lo bay na Centro di Bario Brazil unda lo canta himno y hisa bandera.  Henter dia tin un actividad, cu e.o. cantante Eltienne Yarzagaray, Rolindo Dortalina, Robert Maduro y su Alma Folklorico, tin Rincon Boyzz, y Grupo ESO cu a bin for di Bonaire.  Nan lo anima henter dia.

   Ademas di esaki, lo bay tin e Wega Di Bon Cune, cu ta un wega tipico di Bonaire cu cual bo por gana premio.  Tambe lo tin weganan di Domino henter dia.  Lo tin Dino Jump pa muchanan, y un Bar sumamente bon surti, y lo tin 11 cushina crioyo.

   E actividad n CB Brazil lo cuminza pa 11:30 am.  Henter dia lo tin actividad, fuera lo tin rifa tambe henter dia.