CEDEHM a awor a trece un ‘Red Tent’ mensual pa hende muhernan haya un forma nobo di sosten

ORANJESTAD (AAN): E siman aki, e Centro CEDEHM, cu ta Centro di Desaroyo di Hende Muhe a lanza nan proyecto di “Red Tent”.

   Red Tent ta un grupo di sosten pa hende muher, y e ta tur luna lo tin uno.  Si mira internacionalmente, tin hopi Red Tent mundial.  E ora a pensa pa CEDEHM tuma e iniciativa pa trece e famoso Red Tent aki.

   Esey ta loke Jeanine Tromp kende ta Gender Consultant pa CEDEHM a indica.

   E concepto di un Red Tent ta pa hende muhernan acudi pa asina forma un grupo di sosten, caminda nan ta duna otro apoyo, un caminda unda por sinta combersa riba diferente topico, traha riba intercambio di idea, bin cu arte, y tur esey a base di hende muher pa hende muher.

   Red Tent semper lo ta impulsando diferente topico, esaki lo socede un biaha pa luna, y ya caba nan tabatin e prome.  E siguiente lo ta na Juni, y lo sigui te cu November.  Segun Tromp, tur luna lo bay tin diferente topico.

   Algun di e topiconan cu lo bay papia di dje den Red Tent ta e.o. e parti di amor propio di hende muher, e parti di ser un mama, topico di salud mental, topico di salud sexual, topico di menopausa, soledad, anda cu placa, y mucho mas.

   “Nos lo tin diferente topico pa bin cune, y cada topico lo tin un profesional cu lo bay guia e grupo,” Jeanine Tromp a splica.  E lo ta anochi di 7:00 pm pa 9:00 pm na sede di CEDEHM mes.  Lo bay haci esaki gratis y e ta maximo di 8 hende muher den grupo.

   Si bo kier sa mas, bo tin di inscribi via nan red social di CEDEHM pa asina bo por participa den e esaki.  E hecho cu ta pone maximo di 8 hende den grupo, ta debi cu lo bin cu topico cu lo por ta hopi delicado, y bo ta bay expresa bo mes con bo a experiencia esey, of con lo bo anda cu esaki.  Lo bay tin forma hopi profundo pa trata casonan basta emocional.  Esaki ta algo cu kizas hopi hende lo no expresa nan mes den un grupo grandi.

   Pa bo participa, bo mester ta di 25 aña pariba.