ORANJESTAD (AAN): Diaranson 28 di october, CEDE ARUBA, hunto cu representantenan di e Centronan di Bario,
a haci un presentación na Comision Permanente di Asuntonan Social di Parlamento di Aruba. Durante e reunion a presenta e resultadonan logra den e ultimo añanan, e desafionan actual y e ambicionnan pa desaroyo di bario durante e periodo 2027–2031.
E mensahe central di e presentacion tabata cu Centronan di Bario tin un papel den bienestar, cohesion social y desaroyo di comunidad na Aruba, pero pa nan por cumpli cu e papel aki di forma sostenibel, tin necesidad di mas inversión structural y mehoracion di nan facilidadnan.
Resultadonan positivo di programa Bario Unico
Desde introduccion di programa Bario Unico na 2022, CEDE ARUBA, hunto cu e directivanan y personal di Centronan di Bario, a traha pa fortalece e capacidad di e centronan y amplia nan actividadnan.
Entre e resultadonan presenta ta introduccion di coordinadornan di programa, ampliacion di actividadnan social, cultural y deportivo, mas participacion di diferente gruponan den comunidad y acceso na oportunidadnan nobo di financiamento.
Durante e periodo 2024–2026, e centronan a reporta mas cu 170 actividad diferente cu un participacion amplio den comunidad. E actividadnan ta inclui programanan pa mucha y hoben, actividadnan pa adulto mayor, desaroyo di talento, salud, cultura y inclusion social.
Tambe a logra establece colaboracioncu diferente fondo, organisacionnan local/internacional y sector priva, cu a contribuinaampliacion di e posibilidadnan di e centronan.
Centronan di Bario como partner di desaroyo social y comunitario
Durante e presentacion, CEDE ARUBA y e Centronan a enfatisa cu e funcion di un Centro di Bario ta bay mucho mas leu cu simplemente ofrece un espacio pa actividadnan. E ambicion pa e siguiente añanan ta pa reinforsa e centronan como puntonan pa sostene comunidad, caminda habitantenan por topa otro, participa den actividadnan, desaroyanan talentonan y haya acceso na diferente forma di sosten y informacion. E centronan lo bira partner di CEDE ARUBA tambe pa duna sosten na iniciativanan den e diferente barionan. Un atención special lo bay pa desaroyo di mucha y hoben, programanan despues di scol, prevencion di problemanan social, participacion di personanan grandi di edad y colaboración cu scolnan, organisacionnan social y instancia di gobierno.
Necesidad di financiamiento structural y renovacion
A pesar di e resultadonan positivo, CEDE ARUBA y Centronan di Bario a indica cu e financiamiento actual no ta suficiente pa realiza e ambicionnan di e centronan. Pa e motivo aki a haci un apelacion na Parlamento pa sostene un aumento structural di e presupuesto pa e siguiente cinco añanan. E aumento aki mester permiti e centronan pa fortalece nan organisacion, profesionalisanan operacion, amplia nan programanan y garantisa continuidad di servicio na comunidad.
Ademas, un otro punto importante ta e estado fisico di diferente edificio. Varios centro tin necesidad di renovacion y modernisacion pa por ofrece facilidad nan sigur, accesibel y multifuncional. CEDE ARUBA y Centronan di Bario a solicita Parlamento pa sostene un inversion adicional den infraestructura di e centronan den presupuesto di Gobierno pa 2027.
CEDE ARUBA ta convenci cu inversion den Centronan di Bario no ta simplemente inversion den edificionan of actividadnan, sino un inversion den hende, den oportunidadnan y den futuro di nos comunidadnan.
E Comision Permanente di Asuntonan Social di Parlamento di Aruba y además statenleden a reacciona sumamente positivo y den colaboracion lo duna atencion pa e temanan aki.
