CEDE ARUBA y BARiO UNiCO a organisa un tayer na directivanan di centronan di bario

ORANJESTAD (AAN): CEDE ARUBA su proyecto BARiO UNiCO tin como meta pa revitalisa e Centronan di Bario y atravez di e programa aki transforma nan den un punto central (Hub) pa e bario.

   E Centro di Bario lo ta e hub unda cu e comunidad por topa, educa nan mes trahando proyecto y eventonan , concientiza nan mes con pa biba mas saludabel, conecta y contribui cu nan bario.

   Pa e proyecto aki, BARiO UNiCO ta fungi como catalizador den brinda sosten den area programatico entre otro den e ramo financiero unda e Centro di Bario por sigui genera actividadnan diverso pa e Bario.

   Den cuadro di e proyecto BARiO UNiCO, CEDE ARUBA a organisa e tayer “Un Business Plan pa bo Centro di Bario” enfocando specificamente riba miembro di directivanan di Centronan di Bario.

   E tayer a consisti di diferente session unda a duna topiconan di entre otro vision y mision di un Centro di Bario, su impacto riba comunidad, presupuesto nonprofit, SWOT analisis y finansa sostenibel.

   Meta di e tayernan ta pa yuda directivanan di centro di bario traha un business plan pa fungi como un plan strategico pa yuda un Centro di Bario yega su meta di ta mas financieramente sostenibel. E Business Plan tambe por fungi como un documento pa comparti cu stakeholders cu ta desea di inverti den e Centro di Bario.

   E tayernan a tuma lugar for di November 2, 9, 16 te cu día 23, na Centro Famia Piedra Plat y a wordo facilita pa Miklos Petronia di Petronia Business & Management Consulting.