CEDE Aruba satisfecho cu resultado di Ban Caya Edicion di Pasco

ORANJESTAD (AAN): E proyecto di Bario Unico ta dedica na fortalece y pa promove habitonan saludabel den nos comunidad.

E idea ta enfoca riba un plan strategico con pa activa e bario, unda e evento aki ta sirbi como un Plataforma pa demostra kico e barionan y Aruba tin pa ofrece riba e tereno social, cultural, salud y deporte.

   Diadomingo ultimo barionan di Paradera, Piedra Plat a disfruta di un evento yena cu ambiente di Pasco. CEDE Aruba cu ta maneha e proyecto di Bario Unico a bolbe organiza e evento di Ban Caya edicion di Pasco hunto cu Centro di famia Piedra Plat y Centro di Bario Piedra Plat, cu a resulta mesun exitoso cu e prome Ban Caya na Noord.

   For di 4’or di atardi e bario di Piedra Plat, Paradera, Hooiberg, Sero Pita, Santa Cruz a bini hunto pa asina saborea e dushi platonan di pasco, cumpra articulo of otro materialnan pa pasco, paña, sapato, pintura, mata, bolo of decoracionan cu ta worde usa den e temporada aki. Un bazaar cu a yuda sigur algun instancia y fundacionan di e bario.

   Dilanti di Centro di Bario, riba caminda tambe por a mira e diferente organizacionan Deportivo dunando nan presentacion cu  talentonan den taekwondo, gymnastics, volleyball, dam, rollerblades of skate boarding. Gruponan di persona cu tabata cana, core bicicleta riba e ruta y sinti nan liber pa ta pafo di cas tabata grandi. Den parkinglot di Centro di Bario Piedra Plat, tentnan di diferente fundacion a duna informacion y demostracion, tambe tabata tin un skina di salud full ekipa cu profesionalnan cu tambe tabata bon bishita.

   Talentonan den canto, contamento di storia y baile a duna un bunita presentacion y e publico por a sinta y disfruta di un show spectacular. E evento a sera den ora di anochi cu baile y musica di Robert Maduro y Azucar Navideño band. WAW mobile tambe tabata un di e highlightnan di e evento unda cu muchanan a hunga y reta otro den diferente obstaculo cu a worde prepara pa instructornan di IBiSA.

   Un di e eventonan hopi bon atendi cu publico grandi tabata e Ban Caya Kleuterschool futbol tournament unda 18 team a participa. Ganadornan tabata den categoria di mucha muher Arco Iris Kleutershool y den mucha homber Mon Plaisir School, pabien nan tur nos muchanan y scolnan cu a participa. Nan a ricibi nan medaya di Ban Caya.

   Tabata tin premionan tambe pa e tentnan cu tabata mas creativo den nan decoracion di pasco y nan a gana un basket yena cu producto di Superfood. Esnan cu a gana un basket ta fundacion Briyo di Solo, Fundacion Pa Nos Comunidad, y e ganador principal a bay pa Fundacion Pa Nos Muchanan. Centro di Famia Piedra Plat su mercado di pasco sigur tabata un exito total y tabata bon bishita. Un gradicimento special na e dirigentenan musical y alumnonan di scol di musica di CFPP pa nan concierto duna durante e atardi y anochi aki.

   CEDE Aruba y Bario unico kier gradici tur fundacion, tur partners y segun calculacion di 1500 hende cu a bishita e evento aki. Un danki hopi grandi na Bikers squad Aruba y na tur e Boluntarionan cu a contribui na e evento aki sin lubida IBISA su crew, ministerio di cultura pa nan colaboracion, cuerpo policial, High Performance y Lyo Productions.