CEDE Aruba contento cu protocol firma pa sigui yuda tur caminda na Aruba

ORANJESTAD (AAN): Diabierna atardi Gobierno di Aruba a firma un protocol nobo cu Cede Aruba cu ta inclui tambe Samenwerkende Fondsen Cariben.

Durante un conferencia di prensa presidente di Cede Aruba Sheila van Veen a trece dilanti cu e firmamento aki ta un acontecimento importante.

“E protocol aki ta un continuacion di e protocol anterior y ta bay ta valido pa un periodo di 6 aña”.

E cooperacion entre Gobierno di Aruba, Cede Aruba y Samenwerkende Fondsen Cariben conoce un historia largo di casi 20 aña y den e periodo aki nos cooperacion a conduci na un cantidad grandi di proyecto na Aruba y a contribui na desaroyo di e NGO’s na Aruba, segun van Veen.

El a sigui bisa cu den e ultimo 5 añanan bao di protocol bieu, Cede Aruba y Samenwerkende Fondsen a sostene diferente proyecto importante, incluyendo programanan pa Centronan di Bario, Trai Merdianan, actividadnan pa hubentud y pa nos grandinan, hunto cu algun proyecto grandi manera esun di Ambiente Feliz.

Tambe a yuda den ampliacion di e facilidadnan di Fundacion Contra Violencia Relacional y introduccion di Signs of Safety unda cu 350 profesional ta traha pa detecta casonan di negligencia y maltrato di mucha y combati esaki.

“Samenwerkende Fondsen tabata tin un contribucion grandi tambe durante e crisis di COVID-19, relaciona cu ayudo di cuminda, via Fundacion Pa Nos Comunidad y YMCA”, segun e presidente di CEDE Aruba.

El a splica cu den e protocol tin para cu tur aña Gobierno ta pone un suma disponibel pa proyecto y programanan social, unda cu na un manera profesional CEDE Aruba ta maneha e fondonan aki y ta percura pa nan haya nan destinacion debido riba e isla cerca e diferente NGO’s.

Segun van Veen, e NGO’s aki por haci un apelacion tambe na fondonan di Samenwerkende Fondsen Cariben y cu CEDE Aruba ta sostene e proceso aki.

“Hopi proyecto ta wordo financia hunto di e manera aki y ademas di esaki, Samenwerkende Fondsen Cariben ta pone un micro presupuesto disponibel pa proyectonan mas chikito na Aruba cu CEDE Aruba mes ta maneha”, segun van Veen.