Damara Rasmijn, Relacionista Publico:
ORANJESTAD (AAN) – Damara Rasmijn, Relacionista Publico di Oficina Central di Estadistica (CBS), relaciona cu e encuesta enfoca riba mucha y hoben, cu lo tuma lugar di dia 14 pa 25 di October aki, a indica cu CBS ta buscando encuestadornan.
Rasmijn a menciona cu generalmente, nan ta busca encuestadornan full time, pero mirando cu ta trata di entrevista mucha y hoben, e teller mester ta accesible entre 4’or di atardi pa 8’or di anochi, pasobra mester haya e mucha na cas, y tambe si ta un menor di edad, un mayor mester ta presente hunto cune.
E rekistonan pa un teller ta traha cu tablet, locual ta esencial pasobra e encuesta ta digital, skirbi y lesa Papiamento, Ingles, y Hulandes, nan ta inclui tur idioma, depende di e preferencia di e famia.
Edad ta alomenos 25 aña y preferiblemente cu experiencia di traha cu mucha. Hopi importante ta, ser residente di Aruba y tin personal number, pasobra si no tine no por ricibi e pago, rijbewijs valido y medio di transporte propio.
Lo tin un training obligatorio den cual CBS lo splica tur e preguntanan na e tellernan un pa un, pa asina nan splica den e hogar, si ta necesario, y tambe e parti digital, con e programa ta traha, y cu e ta disponible entre dia 14 pa 25 di October, atardi y anochi, ademas den fin di siman.
Pues, e meta ta pa caba e encuesta den cuater siman, ya cu December ta acercando, Damara Rasmijn, Relacionista Publico di CBS, a duna di conoce.
