Caya Zepp Wever inaugura como homenahe na su legado

ORANJESTAD (AAN): Manera cu DIARIO a trece dilanti caba den edicion di Dialuna, tabata riba Diabierna atardi,

Gobierno di Aruba conhuntamente cu famia di Zepp Wever a inaugura oficialmente Caya Zepp Wever, den presencia di Prome Minister Mike Eman, hunto cu miembro di famia y comunidad.  E caya Zandstraat pues ta stop di existi y a haya nomber nobo.

   Durante e ceremonia, Prome Minister Eman, kende durante añanan a hunga un rol importante den desaroyo y fortalecemento di identidad nacional di Aruba, a comparti palabra cu un fuerte carga personal, recordando e relacion cercano cu Zepp Wever y su famia. El a expresa su gratitud pa e apoyo continuo cu Wever a brinda, inclusive durante momentonan dificil, describiendo e laso aki como uno cu a bay mas aya di amistad y a bira un conexion familiar profundo.

   Segun e Prome Minister, Zepp Wever tabata un persona cu a combina responsabilidad personal cu compromiso comunitario. Eman a resalta con Wever a mustra lealtad y presencia den momentonan clave, algo cu, segun Eman, a defini caracter di un berdadero lider.

   Den su reflexion, Eman a describi Wever como un pionero den comercio na Aruba, kende a contribui significativamente na formacion di e base economico di e pais. El a enfatisa cu su impacto no tabata limita na negoshi, sino cu a trece influencia duradero den desaroyo di comunidad y den fortalecemento di sentido di nacionalismo y patriotismo.

   Ademas, el a pone enfasis riba e balor humano di Wever, destacando su solidaridad, compasion y forma di trata tur hende cu respeto y dignidad. Segun Eman, esaki ta cualidadnan esencial cu mester sigui sirbi como ehempel pa generacionnan futuro.

   Tambe a hiba palabra su bisanieto Zayron Joseph Wever, kende a comparti un mensahe den nombre di familia. Den su discurso, el a recorda Zepp Wever como un figura central den familia y comunidad, resaltando su rol como empresario y fundado di un negoshi reconoci na Aruba.

   Zepp Wever a contribui activamente na desaroyo comercial di Caya Grandi, incluyendo su presencia na e skina di Nassaustraat y Zandstraat, unda su actividad comercial a forma parti importante di e economia dinamico di e area.

   Den palabra comparti di parti di famia, a refleha orguyo y gratitud pa e legado cu Zepp Wever a laga, no solamente den comercio, sino tambe den balornan familiar y comunitario.

   E ceremonia a reuni famia, amigo y miembronan di comunidad, den un ambiente di respet y reconocimiento pa un figura cu a laga un recuerdo duradero den Aruba. E nombramento di e caya ta forma parti di un esfuerso continuo pa honra personanan cu a contribui na desaroyo social, economico y cultural di Aruba, manteniendo bibo nan legado pa futuro.