ORANJESTAD (AAN): E prome periodo di un categoria nobo di e Areglo di subsidio pa Iniciativanan Social pasado di sclavitud Transatlantico pa
e area di Caribe Hulandes ta habri awe. Fundacion- y asosiacionnan por haci un peticion pa subsidio den categoria 2 pa iniciativanan social chikito.
Bao di categoria 2 ta cay: diferente proyecto relaciona cu pasado di sclavitud, organizamento di encuentro- of eventonan cu ta contribui na procesamento di e pasado di sclavitud, proyectonan pa educacion y expresion artistico, incluyendo exposicion y presentacion. E proyectonan mester ta na beneficio di descendientenan di esnan sclavisa (comunidad).
Montante di e subsidio: E montante di e subsidio pa cada peticion pa categoria 2 ta minimo USD 10.000 y maximo USD 25.000. En total tin dos periodo pa categoria 2 den cua organizacionnan por haci un peticion. E prome periodo ta habri di 1 di december 2025 pa 9:00 am (ora di Hulanda) te 12 di januari 2026 pa 5:00 pm (ora di Hulanda) E di dos periodo ta habri comienso di 2028.
Tocante e areglo di subsidio: E areglo di subsidio ta un di e accionnan relaciona cu e disculpanan pa e pasado di sclavitud Hulandes cu minister presidente a pidi riba 19 di december 2022. Pa e areglo di subsidio a pone pa e area Caribense un presupuesto di mas di €29.3 miyon na disposicion.
En total tin 8 tanda di peticion pa cuater diferente subsidio, reparti riba tres aña, den cua organizacionnan por pidi subsidio pa proyectonan cu ta contribui na conscientisacion, reconocemento y conmemoracion y miho comprendemento di e influencia di pasado di sclavitud y su procesamento.
Mas informacion: Pa e parti Caribense di Reino tin un website special, Legacy to Future Funds. Pa bo yega eynan bay na e website aki:
www.bit.ly/fondofut
Riba e website aki tin informacion tocante e areglo di subsidio y un referencia pa e website di Uitvoering Van Beleid (UVB) di Ministerio di Asuntonan Social y Empleo, cu ta ehecuta e areglo . Por entrega un peticion pa subsidio via e portada di subsidio di UVB. Informacion tocante e areglo y tocante e proceso di registracion den e portada di peticion, ta disponibel na Papiamentu, Papiamento, Ingles y Hulandes.
