Minister Wendrick Cicilia:
Cooperacion strategico cu Royal Schiphol Group ta specificamente pa termina proyecto Gateway 2030
ORANJESTAD (AAN): Minister di Turismo, Transporte y Labor, Sr. mr. Wendrick C. Cicilia, den entrevista hopi intenso cu DIARIO, a enfatisa cu nos aeropuerto ta keda un propiedad di hopi balor y strategico di Aruba y lo keda den man di Aruba. Segun Minister Cicilia, ministernan den pasado prome cu n’e a para fuerte pa esaki y e posicion di Aruba no ta bay cambia bou di su maneho.
E mandatario di turismo a remarca cu dia 7 di januari di 2024, Royal Schiphol Group a notifica e minister anterior di turismo, señor Dangui Oduber, cu nan lo desea di termina e cooperacion strategico na juli 2025 pa motibo di diferencia di opinion insuperabel.
“Como Minister di Turismo actual, mi tarea hunto cu mi ekipo di profesional, tawata pa reestablece e cooperacion strategico aki, y pa sigui capitalisa riba e presencia di un entidad cu tin reconocimento internacional cu reputacion grandi den maneho operacional di aeropuertonan”, Minister Cicilia a expresa.
Minister Cicilia a remarca cu esaki ta un relacion di cooperacion strategico y rotundamente a enfatisa cu Royal Schiphol Group lo no ricibi accionnan di nos aeropuerto. “Aeropuerto di Aruba ta keda den man di Aruba. E cooperacion aki cu Royal Schiphol Group ta specificamente, pa termina e proyecto Gateway 2030”, Minister Cicilia a enfatisa.
