Organizacion Panamericano di Salud: --- ORANJESTAD (AAN): E cifranan di Covid-19 na Aruba ta basta stabil den e ultimo simannan.
Hasta por a constata cu e cantidad di casonan di fayecimento a keda mescos for di dia 21 di October ultimo.
Mientrastanto, ta bon pa menciona cu durante ocho siman consecutivo, e number total di casonan di covid-19 na paisnan di Latinoamerica a baha, segun e subdirector di e Organizacion Panamericano di Salud (OPS), Jarbas Barbosa.
Durante e ultimo siman, na e continente a raporta mas di 745.000 caso di covid-19 y un tiki mas di 18.000 morto pa e enfermedad.
Na e paisnan di Norteamerica (Merca, México y Canada) a informa di un caida den e casonan y mortonan pa siman. Tin un disminucion similar na America Central y Suramerica. Despues di varios siman di un brote persistente na Belize, tin un disminucion di casi 20% di e casonan y un disminucion di 60% den e fayecimentonan, Barbosa a agrega.
El a agrega cu e casonan y e fayecimentonan tin un tendencia na e disminucion of ta mantene stabil den gran parti di Caribe, a bisa, pero Barbados ta sigui raporta su mayor number di casonan y mortonan relaciona cu Covid-19 desde cu e pandemia a cuminsa, y tin un escasez di capacidad hospitalario na Republica Dominicana y Trinidad & Tobago.
VACUNACION DEN E REGION
Barbosa a laga sa cu 46% di e poblacion di Latinoamerica y Caribe a wordo vacuna completamente, y alomenos 32 pais ya caba a alcanza e meta di la Organisacion Mundial di Salud di 40% di cobertura di vacunacion, y varios mas ta na caminda pa alcanc'e y super'e, pa final di e aña aki.
Paisnan manera Haiti, Nicaragua, Jamaica, Saint Vincent & Grenadines y Guatemala ainda tin un cobertura di vacunacion bao di 20%.
RIBA E DOSIS DI REFUERZO CONTRA COVID-19
Barbosa a indica cu mester proteha e mas vulnerabel ora cu e disponibilidad di e vacuna ta minimal y cu un bes cu esnan di mayor risico ta proteha, mester vacuna un porcentahe mayor di e poblacion adulto, y despues mester vacuna e grupo di esnan mas jong.
“Nos no tin un evidencia na e momento aki cu vacuna e studiantenan mester ta un rekisito previo pa e reapertura di e scolnan”, Barbosa a señala.
OPS ta recomenda actualmente proporciona un dosis adicional di e vacuna solamente na e personanan den condicion vulnerabel, independientemente di e vacuna cu nan a ricibi caba, manera pashentnan cu cancer, personanan HIV positivo y receptornan di transplante, como tambe esnan mayor di 60 aña cu a ricibi e vacunanan di Sinovac of Sinopharm.
"E personanan aki mester di un dosis adicional pa ta protegi di malesanan grave y e riesgo di muri pa Covid-19", Barbosa a remarca, "Nan vacunacion no por wordo considera completo te ora cu nan a haya e di tres dosis".
Jarbas Barbosa a finalisa bisando cu "ainda no tin suficiente evidencia pa recomenda e vacuna di refuerzo para otro gruponan cu ta completamente inmuniza, specialmente ora cu e disponibilidad di e vacuna ta limita y hopi den nos regionnan no a haya nan prome inyeccion".
