ORANJESTAD (AAN) – Minister di Husticia, señor Rocco Tjon, a duna informacion tocante desaroyonan di su cartera, den e conferencia di prensa di gobierno di tur Diahuebs.
E mandatario a elabora tocante e tema di seguridad den nos frontera, mirando e incidente cu a sosode recientemente, y cu a genera basta pregunta di pueblo y tambe di prensa.
“Ta asina cu un boto a drenta y ta cinco persona a logra drenta Aruba, di cual tin detencion a cay, y nan ta investigando pa asina por logra haya sa mas, di e otro personanan cu a tambe drenta.
Sinembargo, loke ta importante pa informa, ta cu nos tin un plataforma unda cu tur e hefenan di departamentonan cu tin un responsabilidad primordial den e area aki, ta reuni tur siman. Aki ta trata di Cuerpo Policial, NCTVI Oficina di Interpol na Aruba, Imigracion, Warda Nos Costa y Kustwacht.
Esaki ta hopi importante, pa asina nos keda delinea tur e procesonan di trabao riba otro, pa purba evita e casonan aki, mas tanto posible”, Minister Rocco Tjon a declara.
Obviamente inversionnan pa loke ta trata e radar y den tecnologia, tambe ta forma parti di e maneho, y esaki ta algo cu, mas y mas, tambe ta sosode tambe den colaboracion cu KPA y Kustwacht.
“Mi ta kere cu tambe ta hopi importante pa evita cu hopi departamento haci e mesun tipo di trabao y di e forma ey ta stroba cu cierto trabaonan cu djis, no ta wordo haci”, e dignatario a señala.
Minister Rocco Tjon a aclarea tambe e aspecto di Duana y el a bisa cu diaranzon, e tabata tin un bon combersacion cu e lider sindical di SADA, ya cu a crea impresion cu Duana no a wordo invita.
“E ta asina cu enberdad Duana tabata forma parti di e “Kust Surveillance Team” den pasado, pero pa falta di capacidad nan no a forma parti di e team aki, e ultimo temponan. Pesey, den e reunion strategico cu nos tabata tin, por cierto tabata tin un pregunta cu mi a haci, cu mi ta haya ta necesario pa Duana ta bek na mesa, pero no ta duana so, pero a puntra pa mesora explora posibilidadnan pa nos por bay haci mas uso, y traha mas di cerca cu nos Arumilnan”, Minister di Husticia a señala.
E mandatario a bisa cu esaki ta decision cu a wordo tuma, y cu tur e reunionnan ta wordo notula, pues, den e siguiente reunion ora e director di Duana tambe por participa, e por wak cu esaki ta decision cu a wordo tuma.
Tjon a reitera cu ta masha importante pa mas y mas, tur e departamentonan cu tin un rol traha hunto, y pesey a traha un planning pa di awo te cu fin di aña, percura pa intensiva tur e patruyanan, pa loke ta e kusts-surveillance, pero alavez traha un planning te cu fin di aña pa percura cu e radar, constantemente, tin personal den dje.
“Y no personal di un departamento so, pero manera mi a bisa, colaboracion caminda ta bay tin personal di WNC, Imigracion, Kustwacht, KPA, y Duana tambe pa traha mas cerca di otro y asina nos por eleva seguridad”, Minister Rocco Tjon a duna di conoce.
