Siman a habri cu 17 persona interna na Hospital - *Otro residente a fayece relaciona cu Covid
ORANJESTAD (AAN): Siman a habri cu cifranan mas abao cu locual a bin ta registrando e dianan aki. Pero esey ta un tendencia normal den weekend ya cu hopi hende no ta acudi pa haci test.
Departamento di Salud a duna di conoce cu segun resumen di dialuna, 31 persona a recupera y un total di 42 caso nobo di COVID-19 a keda registra cual 3 ta turista y 39 ta residente.
E cifranan aki ta representa un 'Positivity rate' bao di residentenan di 29%.
Cantidad di casonan activo di COVID-19 ta 489 y cantidad di fayecidonan relaciona cu COVID-19 a aumenta na 111 cu fayecimento di un residente.
Datonan ta ilustra subida continuo di casonan nobo cu un average semanal di 57 caso pa dia y un average di 'positivity rate' semanal di 26% pa dia.
Hospital tin 17 persona interna di cual 4 ta den ICU y riba piso general tin 13 persona interna.
