Caso serio di intento di asesinato di un dama na Savaneta

Habitantenan a core sali pa intermedia

ORANJESTAD (AAN): Diamars den careda di 8:45 pm, yamadanan a cuminsa drenta na Central di Polis, unda varios hende ta solicitando yudansa urgente na un cas na Savaneta.  Esey ta pa motibo cu habitantenan a haya nan ta intermedia, y asina “rescata” un dama cu a worde maltrata, y casi a perde su bida ora cu su pareha a purba na intencionalmente primi trot y pasa auto riba dje.

   Mesora un unidad di Polis di San Nicolas a bay na e lugar, y aki a bin topa cu un dama herida, ta ricibiendo yudansa di habitantenan.  Inmediatamente nan a splica Polis, cu e dama ey riba Diamars anochi a haya discussion cu su casa.  E discusion aki a escala sinembargo, y e homber a usa forza pa na forma violento a maltrat’e seriamente.  Esey no ta tur, pasobra e homber a dicidi na bay e siguiente nivel, esta di trata di pasa auto riba e dama.  Den e intento aki, el a keda lastra e dama cu e vehiculo.

   Aki ta unda e habitantenan cu a scucha e dama ta grita pa auxilio, a sali pafo y sin duda un rato a subi caminda y a yuda e dama.  Aki ta unda cu e homber agresor a bira hopi timido, y a core bandona e lugar den su auto compacto Hyundai Getz color di oro.

   Mirando cu e dama a keda seriamente maltrata. Polis mesora a solicita Central di Polis pa manda un ambulance.

   Mientras cu Polis a cuminsa tuma dato di e dama, y pa haya sa nomber di e homber violento, ora cu nan a tende su nomber... ya caba Polis sa kende e ta.  E ta un persona cu na numeroso ocasion a haye envolvi cu Polis y Husticia.

   Na yegada di Paramediconan, nan a revisa e dama y a conclui cu e golpinan cu el a ricibi ta hopi fuerte, y nan ta prefera di bay cune mesora pa Servicio di Emergencia te na Hospital pa mas atencion medico.  A pone Bureau Slachtofferhulp tambe na altura, y esaki a acudi na Hospital pa brinda yudansa.

   Autoridad a indica na e dama, cu despues di atencion medico ta bon idea pa e acudi na Warda di Polis na San Nicolas pa entrega keho na Recherche di San Nicolas, pa e caso serio aki.