Otmar Oduber contento cu un fecha!
*Luz na final di tunel despues di mas di 4 aña
ORANJESTAD (AAN): “Tin porfin un luz na final di e tunnel”, asina ex minister Otmar Oduber a duna di conoce e siman aki na comunidad. Despues di a bay varios biaha corte y sali cu denuncianan di abuso cometi den e caso aki, porfin Diamars ultimo corte a informa señor Oduber cu e tratamento di e caso lo inicia dia 17 di November y ta ser spera cu pa dia 2 di December esaki lo yega na un fin.
Na e momentonan aki ainda lo tin cu scucha algun testigo cu defensa di Oduber a pidi pa worde scucha y esakinan lo tuma lugar den e siman di 26 di Augustus manera cu e reces di corte termina.
Lo bira un siman sigur hopi interesante, paso pa prome biaha cu lo pone bao huramentacion dilanti di un Hues Comisario funcionarionan di LandsRecherche y RST di hulanda cu den e caso aki nan a worde yama dilanti pa e defensa di Oduber mirando cu a keda constata cu e rapportnan traha tabata completamente falso.
“Mi a prefera claro pa e caso cuminza mas prome, pero despues di ta wardando mas cu cuatro aña caba, e tres lunanan aki mi ta kere lo pasa lihe y asina mi por defende mi mes di e acusacionnan sin base aki”, asina Oduber a declara den un comunicado recibi.
Un peticion nenga: Di otro banda Hues Comisario a nenga e peticion di Ministerio Publico.
Algun siman pasa señor Oduber a denuncia tambe e hecho cu Ministerio Publico a laga haci un peticion na Hues Comisario pa tene e identidad di e polis Hulandes-Europeo di RST scondi, mientras no a pidi esaki pa esnan di KPA y LandsRecherche cu si ta Arubiano.
Un acto cu e ex-Minister a considera un discriminacion y acto di sinberguenza di parti Ministerio Publico, pasobra ta netamente e personanan aki ta esnan cu mester bin splika pakico a traha raportnan falso y cu a conduci na henter e caso aki desde principio.
E ex-mandatario a sigui bisa cu e ta convenci di cu e berdad lo sali na cla y cu e pesadiya aki por pasa pa pasado y asina sigui cu su bida y di su famia cu metanan nobo pa futuro.
