Accion di Ministro Ursell Arends ta conduci na controversia legal
*Decreto Ministerial por deshaci di alma democratico di gobernacion?
*Coalicion a discuti asunto serio di criminalidad cu prueba cu Husticia?
ORANJESTAD(AAN)—E desaroyonan politico di e siman aki, ta bay mucho mas leu cu un decision tuma pa un Ministro, cu sin consulta alguno den e coalicion cu ta base di su existencia como Ministro, a dicidi di cambia reglanan pa un permiso di taxi.
Pa atende cu e asunto aki, mester tuma nota di e posibilidad cu leynan di Aruba ta entrega na e Ministro, pero tambe di otro leynan basico cu cual e desaroyo aki ta mishi directamente y awort mester bira tema den Parlamento, cu no por permiti Aruba bay urna electoral na 2025 sin un aclaratorio.
Democracia ta ocupa un lugar absoluto den e cuadro di leynan di Aruba, cu ta duna poder na Ministronan pa atende asuntonan diario di gobernacion, cu mester por topa cu permiso di Parlamento di Aruba, cu ta e organo cu segun resultado di eleccion, pa por papia di un maneho democratico di e pais.
E sistema legal di Aruba ta permiti pa Ministronan, cu ta wordo nombra dor Parlamento, tuma decisionnan riba nan tereno di acuerdo cu loke ley cu a wordo discuti y introduci dor di Parlamento, ta dicidi.
Ta Ley a regla cu den cierto casonan, Ministronan por tuma nan propio decision, pero den esaki mester tuma nota tambe cu na Aruba gobernacion finalmente mester keda den man di Pueblo.
DIARIO den ultimo dianan tabata den consulta cu expertonan, cu ta indica cu algo serio a pasa na Aruba, caminda ni coleganan di Ministro Ursell Arends tabata na haltura cu e ta cambia Ley cu ta mishi cu e permiso pa taxi.
Cu mescos cu ta e caso den tanto sector, manera hasta casonan di corupcion politico na e nivelnan mas halto, e leynan basico di e pais ta exigi pa ora lansa acusacionnan serio, pone prueba riba mesa.
Den e caso aki, e pregunta serio ta centraliza rond di e hecho cu ni otro Miembronan di Conseho di Ministro, cu ta responsabel pa sectornan manera turismo, economia y sigur husticia, tabata na haltura di e decision di Ministro Ursell Arends cu e ta cambia e ley pa permiso di taxista.
Informantenan a trece dilanti cu mas lamentabel den e henter e caso aki ta, cu e imagen y reputacion di taxisti a wordo afecta tambe cu e ponencianan di criminalidad den asuntonan di permiso di taxi.
Manera expertonan legal a trece dilanti na DIARIO, e pregunta ta keda, si Ministro Ursell Arends a papia cu autoridad penal na Aruba riba casonan criminal den mundo di taxi, cu tin permiso basa directamente riba proteccion di e ciudadano contra peligro pa su persona den transporte publico, den e caso aki di taxi como tal.
Segun informantenan, aunke cada Ministro segun ley vigente tin su propio responsabilidad, cu ta un asunto cu DIARIO na diferente ocasion a pone na discusion pasobra e Ministro manera den e caso aki, no a considera necesario pa hiba un consulta cu Parlamento di Aruba pa na forma planifica, atende cu cambio necesario riba tereno di taxi.
Ta normal den mundo politico, cu sigur teniendo cuenta e buraconan democratico cu e sistema legal nacional ta laga habri, tin consulta di fraccionnan, consulta di coalicion sigur ora ta trata un asunto asina importante cu ta misha tambe cu Ministerionan di entre otro Economia, Social, Turismo.
Informantenan a uza e palabra “elegante” pa un gobernante atende cu su coleganan mas ainda teniendo cuanta cu su partido cu a pone su persona como Ministro, ta un partido chikito.
Na mes momento, e pregunta serio ta surgi, si a presenta pues preocupacion documenta na Ministerio Publico, na Cuerpo Policial, na Corte di Husticia cu ta parti directo di loke segun Ministro Ursell Arends a uza como motibo di su decision di cambio den permiso, cu ta criminalidad cu ta wordo comete cu permiso di taxi.
Informantenan clave ta di opinion, cu e asunto aki merece discusion na e nivelnan mas halto y cu e partido cu Ministro Ursell Arends ta representa, ta responsabel pa conduci cu splicacion pasobra ni den consulta di coalicion, e asunto aki a wordo discuti si tuma nota di reaccionnan di otro Ministronan y den seno politiconan miembro di Parlamento, cu ta e representacion di Pueblo di Aruba, den cual e partido di Ursell Arends ta un minoria.
Informantenan ta papia di un suceso serio riba tereno di democracia pero tambe den e Trias Politico, cu a exigi pa casonan cu a duna motibo pa cambia Ley, wordo entrega sigur dor di un Ministro, na sector di Husticia pa persecucion legal manera ta wordo exigi di tur ciudadano cu ta na haltura di crimen!
