ORANJESTAD (AAN): Siman pasa e Hues di Hulanda cu a bin special pa trata e caso penal Avestruz,
a duna un schedule di tratamento di e caso penal. Dia 17 di Juni 2022, Hues den su decision a pone e reclamo di tanto Fiscal como e abogadonan un banda y a mantene e proposicion cu el a haci.
Caso ta cuminsa cu 3 sospechoso: Huez a bisa cu tratamento di e caso penal Avestruz ta cuminsa 5 September pa 11’or di mainta caminda lo bay evalua con leu ta cu e investigacionnan. Manera ta conoci, interogacion di testigonan ta tumando lugar te fin di Augustus 2022.
Hues a pone dia 6 September 2022, un dia di reserve, pendiente con dia 5 September bay.
Dianan 7 y 8 September 2022 lo cuminsa cu tratamento di e casonan penal contra e sospechosonan Sussebeek, Harms y Sevinger. E plan cu Hues a traha ta cu tratamento di e caso lo cuminsa 8.30 di mainta. Den oranan di merdia, e dos Fiscalnan lo duna e requisitorio riba e caso penal.
Dia 8 di September 2022 pa 8.30 di mainta, ta oportunidad pa e abogadonan mr. Kock y mr. Illes di Sussebeek y Sevinger, mr. Carlo di Harms hiba nan defensa. Despues e dos Fiscalnan tin chens di reacciona y despues ta e abogadonan ta reacciona.
Tres luna pa trata Caso Avestruz: Matutino DIARIO por a compronde cu e caso Avestruz ta parti den diferente caso. Hues su plan ta pa e tratamento dura 3 luna.
- • E promer caso na September 2022 ta Stichting FCB. Den e caso aki tin 3 sospechoso.
- • Despues lo sigui na October 2022 cu 6 sospechoso. E caso ey ta hiba e nomber Elenath y Deshaun.
- • Na November 2022 tin e caso Damira cu 5 sospechoso y despues e caso Bucuti cu 2 sospechoso.
- • Despues ta sigui cu caso di malversacion y labamento di placa contra Benny Sevinger.
Cinco caso contra Benny Sevinger: Ta asina cu Benny Sevinger ta envolvi den tur e 4 casonan y ariba dje tin e caso cu Fiscal a anuncia caminda kier kita casi 1 Miyon Florin di Benny Sevinger. En total ta 5 caso lo tin contra Benny Sevinger.
No tin un fecha menciona pa sentencia pero Hues a menciona December 2022 pa trata circumstancianan personal di cada sospechoso. Na December 2022, e Fiscalnan lo exigi castigo y abogadonan lo hiba defensa. Despues tur e sospechosonan tin e derecho di ultimo palabra. Esaki lo ta 14 December 2023. Tur cos ta mustra cu na Januari 2023, lo por spera sentencia.
