Cas di Titi Tromp na Alto Vista 69 a ricibi seyo di monumento protegi

*Un legado cu ta sigui biba den Alto Vista

ORANJESTAD (AAN): Despues di e ceremonia na Alto Vista 12, Prome Minister mr. Mike Eman a continua su recorido diamars atardi cu un di dos momento special na Alto Vista 69, cas di Titi Tromp. Den presencia di famia, amigo y invitado, e cas a ricibi oficialmente e seyo di monumento protegi, reconociendo su balor historico y cultural pa Aruba.

Durante e ceremonia, Prome Minister Eman a enfatisa cu e reconocimento no ta solamente pa un edificio, sino tambe pa e historia di esnan cu ta biba den dje. El a destaca e papel importante cu Titi Tromp a hunga den cria y guia diferente generacion, y e legado cu e famia a sigui construi e ultimo añanan.

Segun e Prome Minister, e cas ta representa hopi mas cu piedra y muraya. E ta un simbolo di trabou duro, perseverancia y sentido comunitario. El a señala cu diferente generacion di e famia Tromp a contribui na desaroyo di Aruba y cu e historia di e cas ta forma parti di e historia mas grandi di nos pueblo.

Un cas yen di recuerdonan

Richard Tromp, yiu di Titi Tromp, a comparti su recuerdonan personal di tempo e tabata mucha na e cas. El a conta con e cas y su patio tabata un centro di actividad pa mucha; mucha di e bisindario, unda nan tabata hunga, core y crea e amistadnan cu a dura te dia di awe.

Segun Richard, e noticia cu e cas lo ricibi e seyo di monumento protegi a bin como un sorpresa completo pa e famia. El a confesa cu e momento a haya sentimento profundo cu ainda awe el ta sinti hopi emocion ora pensa riba e reconocimento.

Alexis Tromp sobrino di Titi Tromp tambe a comparti su aprecio pa e homenahe, describiendo e momento como un biahe atras den tempo. E ceremonia a trece hopi nostalgia y a haci e diferente recuerdo di infancia bolbe biba.

Conservando e alma di Alto Vista

Cu e instalacion di e seyo di monumento protegi na Alto Vista 69, Aruba a agrega un otro capitulo importante na su esfuerso pa conserva patrimonio historico. E reconocimento no solamente ta proteha un cas cu balor arkitectonico y historico, sino tambe e historia di un famia cu a laga un marca duradero riba comunidad.

E ceremonia a culmina cu e instalacion oficial di e seyo, un acto simbolico cu ta garantisa cu e historia di Titi Tromp y su famia lo sigui biba pa e generacionnan den futuro.