Cas di Cultura cu proyecto 'Memoria Ancestral'

*Recordando storianan silencia, pa un futuro empodera

ORANJESTAD (AAN):  En conexion cu e conmemoracion di abolicion di sclavitud na Aruba 160 aña pasa, Cas di Cultura a inicia un proyecto total pa stimula dialogo riba e topico, herencia y decendecia di nos pueblo.

            Artista multidisciplinario y contemporaneo Natusha Croes a tuma e encargo pa crea un proyecto den dialogo cu educadornan, historiadornan, artistanan y institutonan cu a resulata den e proyecto Memoria Ancestral.

            E proyecto multifacetico, artistico y inspirativo aki ta consisti di 3 encuentro comunitario, un obra teatral, un video-documental y un 'booklet' informativo y interactivo.

            Obhetivo di e proyecto: Con nos por para mas fuerte den nos sapatonan, enfrentando un futuro cu mas siguransa, cu un autoestima mas grandi y completamente orguyoso di nos identidad? Kico ta e storianan silencia den nos comunidad, nos raiznan, berguensanan inhusto, custumbernan keri?

            E temanan aki, lo wordo treci dilanti den e presentacion dunando publico, nos tur, e espacio sigur pa expresa nos mes vulnerabelmente. Laga e berguensa un banda y desmantela loke ta oprimi nos expresion total.

            Ta importante pa crea mas conscientisacion tocante e topico aki di nos decendencia(nan) pa asina por compronde miho con Aruba su pasado ainda ta y por influencia nos presente y futuro. Den un forma artistico, mescla cu informacion veridico e topico ta wordo treci dilante. Arte ta duna herment pa por expresa nos mes y procesa sucesonan y traumanan di bida.

            E contenido di e obra teatral, cu ta uza baile, musica y video tambe, a resulta a base di investigacion hiba cu esnan ya menciona anteriormente y ta wordo realisa pa Natusha Croes, Darwin Winklaar y Layzmina Emerencia, tambe den consulta cu Kevin Gumbs.

             E artistanan envolvi a sinti hopi emocion ora di explora nan mesun decendencia pa por duna mas di nan mes pa e obra. No solamente topico di nan decendencia a asombra nan pero tambe a bay bek na nan infancia unda awor numa por a refleha riba sucesonan relata na nos herencia, cu a impactanan pa bida den nan desaroyo. E bunita ta cu awor tur e elementonan aki por a wordo procesa y duna un lugar.

            Pa crea un impacto duradero e deseo ta pa 4000 persona wak e obra teatral, pa cual lo tin 10 presentacion na Cas di Cultura. E presentacion, inclusivo sesion di pregunta y contesta, ta dura maximo 90 minuut (sin pauze).

            Tin 8 presentacion di mainta, fecha y ora: 27 y 28 di juni 2024 y dianan 2 y 5 di juli - presentacionnan: 8:30am y 11.00am. Pa scolnan (alumno, maestro y mayornan), empleadonan di fundacionnan y empleado publico e presentacionnan di mainta ta GRATIS!

Pa empleadonan, teamnan, di sector priva y pencionadonan e presentacion ta Awg. 15,- pa persona. Registra via nos Google Form of e QR code obtenibel riba nos Facebook Page of yama 582-1010.

            Tin 2 presentacion di anochi pa publico general, fecha y ora: 5 y 6 di juli 2024 - 8pm. Carchi obtenibel na prijs rasonabel.

            Ban crea espacio pa nos storianan silencia, pa por enfrenta un futuro empodera!